قازاقستان پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا سويلەگەن سوزىندە قحا قىزمەتىنىڭ كەلەشەكتەگى باستى باعىتتارىن اتاپ ءوتتى. ول اسسامبلەيانىڭ ايماقتارداعى جۇمىسىن جانداندىرۋ، مادەنيەت پەن ونەر ارقىلى ۇلتتىق بىرلىكتى نىعايتۋ، سونداي-اق ەتنوسارالىق تاتۋلىقتى ودان ءارى تەرەڭدەتۋ قاجەتتىگىن باسا ايتتى. بۇل تۋرالى Aqshamnews.kz سايتى حابارلايدى.
پرەزيدەنت ەڭ الدىمەن اسسامبلەيانىڭ وڭىرلەردە بەلسەندى بولۋىن تاپسىردى. ول بىلتىر تۇركىستان قالاسىندا اشىلعان جاڭا دوستىق ءۇيىنىڭ ماڭىزىن اتاپ ءوتتى.
"ەندى وسىنداي دوستىق ءۇيىن حالىق تىعىز قونىستانعان الماتى وبلىسىندا سالۋ قاجەت. بۇل عيمارات ايماقتىڭ قوعامدىق ءومىرى ءۇشىن وتە ماڭىزدى ورتالىق بولماق"، – دەدى توقايەۆ.
سونىمەن قاتار قورداي، ۇيعىر، سايرام، پانفيلوۆ سياقتى ەتنوستار تىعىز شوعىرلانعان اۋدانداردا اسسامبلەيا قۇرىلىمدارىن اشۋ قاجەتتىگىن ايتتى. پرەزيدەنتتىڭ سوزىنشە، بۇل باستاما قوعامدىق كەلىسىمدى تەرەڭدەتۋگە جانە جەرگىلىكتى دەڭگەيدە بىرلىك ساياساتىن ءتيىمدى جۇرگىزۋگە سەپ بولادى.
"دوستىق ۇيلەرى تاعى بىرنەشە قالا مەن اۋدان ورتالىعىندا اشىلادى دەپ جوسپارلانىپ وتىر. مەن بۇل باستامانى قولدايمىن"، – دەدى ول.
مەملەكەت باسشىسى ۇلتتىق بىرلىكتى نىعايتۋدا مادەنيەت پەن ونەردىڭ الەۋەتىن تولىق پايدالانۋ كەرەك ەكەنىن ايتتى. ونىڭ پىكىرىنشە، ءارتۇرلى ەتنوستاردىڭ مادەني مۇراسى — قازاقستان مادەنيەتىنىڭ اجىراماس بولىگى.
"«بىرلىگىمىز – ءارالۋاندىقتا» قاعيداتىن جۇزەگە اسىرۋ ءۇشىن مادەنيەت پەن ونەردىڭ الەۋەتىن تولىق پايدالانعان دۇرىس"، – دەپ اتاپ ءوتتى پرەزيدەنت.
ول ەلىمىزدە ورنالاسقان الەكساندر پۋشكين، تاراس شيەۆچەنكو، فەدور دوستويەۆسكيي، ميحايل شولوحوۆ سىندى ۇلى تۇلعالارعا ارنالعان مۋزەيلەردىڭ قازاقستان مادەنيەتىنىڭ باي قورىن تولىقتىرىپ وتىرعانىن ايتتى. بۇل مۋزەيلەردىڭ ەكسپوزيسيالارىن استانا مەن الماتى قالالارىندا ۇيىمداستىرىپ، كوپشىلىككە تانىتۋ ماڭىزدى.
سونىمەن بىرگە، كەيبىر ەتنومادەني بىرلەستىكتەر جيناعان ونەر تۋىندىلارى مەن ەتنوگرافيالىق جادىگەرلەر دە ۇلتتىق مۇراعا اينالۋعا لايىق ەكەنى اتاپ ءوتىلدى.
قاسىم-جومارت توقايەۆتىڭ قازاقستان حالقى اسسامبلەياسى سەسسياسىندا كوتەرگەن باستامالارى – ەل ىشىندەگى قوعامدىق كەلىسىم مەن ۇلتتىق تۇتاستىقتى ساقتاۋ جولىنداعى ناقتى قادامدار. وڭىرلىك جۇمىستى كۇشەيتۋ، مادەني مۇرانى كەڭىنەن ناسيحاتتاۋ جانە ەتنوسارالىق ديالوگتى تەرەڭدەتۋ – اسسامبلەيا الدىندا تۇرعان ستراتەگيالىق مىندەتتەر رەتىندە بەلگىلەندى.