اسقار مامين ۆولونتەرلىك قوزعالىستى ىنتالاندىرۋ شارالارىن كۇشەيتۋدى تاپسىردى
ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ۆولونتەرلىكتى دامىتۋدىڭ 2021-2023 جىلدارعا ارنالعان جول كارتاسىنىڭ ورىندالۋ بارىسى قارالدى، دەپ حابارلادى Almaty-akshamy.kz ق ر پرەمەر-مينيستردىڭ سايتىنا سىلتەمە جاساپ.
اقپارات جانە قوعامدىق دامۋ ءمينيسترى ايدا بالايەۆا، الماتى وبلىسىنىڭ اكىمى اماندىق باتالوۆ، نۇر-سۇلتان قالاسىنىڭ اكىمى التاي كولگىنوۆ، ۇلتتىق ۆولونتەرلىك جەلىسىنىڭ ديرەكتورى تاتيانا ميرونيۋك بايانداما جاسادى.
ۆولونتەرلىك قازاقستاندىقتاردىڭ ازاماتتىق بەلسەندىلىگىنىڭ ماڭىزدى فورماسىنا اينالۋدا. ۆولونتەر جىلىن وتكىزۋ ناتيجەسىندە ۆولونتەرلىك ۇيىمدار سانى 3 ەسەگە، بەلسەندى ەرىكتىلەر سانى 4 ەسەگە ارتتى. پاندەميا كەزەڭىندە ەلىمىزدە 950 مىڭنان استام ەرىكتىلەر گۋمانيتارلىق كومەكتى تاراتۋدا، مۇمكىندىگى شەكتەۋلى ادامدارمەن، بالالارمەن جانە جاسوسپىرىمدەرمەن جۇمىس ىستەۋدە جانە ت.ب كومەك كورسەتتى. وتكەن جىلى قۇرىلعان ۆولونتەرلەردىڭ رەسپۋبليكالىق جانە 17 وڭىرلىك فرونت-وفيستەرىنىڭ جۇمىسى جالعاسۋدا. وسى جىلدىڭ ءى جارتىجىلدىعىندا 113 مىڭنان استام ۆولونتەردىڭ قاتىسۋىمەن 6 مىڭعا جۋىق ءىس-شارا وتكىزىلدى. ۆولونتەرلىكتى دامىتۋدىڭ 2021-2023 جىلدارعا ارنالعان جول كارتاسى اياسىندا 528 ملن تەڭگە سوماسىنا 40-تان استام جوبانى ىسكە اسىرۋ كوزدەلگەن. «TALAP» ورتالىعىنىڭ باعالاۋىنشا، 2020 جىلى ۆولونتەرلەردىڭ قازاقستان ەكونوميكاسىنا قوسقان ەكونوميكالىق ۇلەسى 3،9 ملرد تەڭگەنى قۇرادى. ۆولونتەرلىك قىزمەتتىڭ ەڭ كوپ ۇلەسى دەنساۋلىق ساقتاۋ جانە الەۋمەتتىك قىزمەتتەر سالاسىنا 68%، اباتتاندىرۋ جانە تازالىق سالاسىنا 12% تيەسىلى.
«ءبىز ەرىكتىلەر قوزعالىسىنىڭ زور الەۋەتى مەن ناقتى پايداسىن كوردىك. سوندىقتان مەملەكەت باسشىسى قاسىم-جومارت توقايەۆتىڭ باستاماسى بويىنشا بيىلعى جىل ۆولونتەرلىك باستامالاردىڭ جالعاسىنا اينالدى. قوعامدا ءوزارا كومەك پەن قايىرىمدىلىق پرينسيپتەرىن ودان ءارى دامىتۋ قاجەت»، — دەدى اسقار مامين.
اقپارات جانە قوعامدىق دامۋ مينيسترلىگىنە مۇددەلى مەملەكەتتىك ورگاندارمەن بىرلەسىپ ۆولونتەرلىك قىزمەت ماسەلەلەرى بويىنشا زاڭ جوباسىن ساپالى پىسىقتاۋدى قامتاماسىز ەتۋ جانە ونى بيىلعى 1 شىلدەگە دەيىن ۇكىمەتكە ەنگىزۋ، ساراپشىلارمەن بىرلەسىپ ۆولونتەرلىك قىزمەتتى قولداۋ ستاندارتىن ازىرلەۋ جانە ۆولونتەرلىكتى ودان ءارى دامىتۋدىڭ نەگىزگى باعىتتارى بويىنشا مەملەكەتتىك ورگاندارعا ۇسىنىمدار ازىرلەۋ تاپسىرىلدى. پرەمەر-مينيستر مەملەكەتتىك ورگاندارعا قۇقىقتىق جانە پسيحولوگيالىق كومەك كورسەتۋ، تاريحي-مادەني مۇرا وبەكتىلەرىن ساقتاۋ، توتەنشە جاعدايلاردىڭ سالدارىن جويۋ جانە باسقا دا سالالاردا سالالىق ۆولونتەرلىككە، ونىڭ ىشىندە سيفرلىق، ونلاين-ۆولونتەرلىك، ەكوۆولونتەرلىك ءۇشىن جاعداي جاساۋدى جانە جانداندىرۋدى تاپسىردى. وڭىرلەردىڭ اكىمدىكتەرىنە ەرىكتىلەر قوزعالىسىن ىنتالاندىرۋ شارالارىن كۇشەيتۋ، تۇراقتى مونيتورينگ جاساۋ جۇيەسىن جولعا قويۋ جانە وسى جىلدىڭ 1 تامىزىنا دەيىن 2023 جىلعا دەيىنگى وڭىرلىك جول كارتالارىن قابىلداۋ تاپسىرىلدى. ۇكىمەت باسشىسى تاۋەلسىزدىكتىڭ 30 جىلدىعىن مەرەكەلەۋ اياسىندا ۆولونتەرلىك ۇيىمدارمەن بىرلەسىپ، جالپىۇلتتىق يگى ىستەر مارافونىن ىسكە اسىرۋعا جۇرتشىلىقتى كەڭىنەن تارتۋ قاجەتتىگىن اتاپ ءوتتى. اقپارات مينيسترلىگىنە مەملەكەتتىك ورگاندارمەن جانە ۇلتتىق ۆولونتەرلىك جەلىمەن بىرلەسىپ، ۇزدىك ۆولونتەرلىك تاجىريبەلەردى بەلسەندى تۇردە ناسيحاتتاۋ جانە بارلىق دەڭگەيدە ءاقپاراتتىق-تۇسىندىرۋ جۇمىستارىن كۇشەيتۋ تاپسىرىلدى.
