23 ماۋسىم كۇنى وڭىرلىك كوممۋنيكاسيالار قىزمەتى الاڭىندا سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى جانداربەك بەكشين شۇعىل بريفينگ وتكىزدى. ول مەگاپوليس ەپيدەميولوگتارى جاڭا مۋتاسيالاردى انىقتاۋ ءۇشىن الماتى اۋماعىندا اينالىمدا جۇرگەن كوروناۆيرۋس شتامدارىنا گەنەتيكالىق زەرتتەۋ جۇرگىزىلىپ جاتقانىن حابارلادى.
الماتىنىڭ باس سانيتارلىق دارىگەرى جانداربەك بەكشين قالادا اينالىمداعى 90%-عا جۋىق مۋتاسيالانعان شتامداردىڭ تارالۋىنا بايلانىستى قالاداعى ەپيدەميولوگيالىق جاعداي كۇردەلى ەكەنىن ايتتى.
«12-19 ماۋسىم ارالىعىندا مۋتاسيالانعان شتامداردىڭ اينالىمىن انىقتاۋ ماقساتىندا پتر-دياگنوستيكاسىن جۇرگىزدىك. 53 زەرتتەۋدىڭ ىشىنەن بريتاندىق شتامم 44-تە (83%)، وڭتۇستىكافريكالىق شتامم ەكى جاعدايدا (4%) جانە بىرەۋىندە نيۋ-يورك (1،8%) شتامى انىقتالدى. قالعان 11%-دا COVID-19 ۆيرۋسىنىڭ مۋتاسياسى انىقتالمادى»، – دەدى ج. بەكشين.
سانيتارلىق-ەپيدەميولوگيالىق ۆەدومستۆو باسشىسىنىڭ ايتۋىنشا، 16 ماۋسىمنان باستاپ جۇقتىرۋ كورسەتكىشى 0،7-دەن 0،96-عا دەيىن وسكەن.
«بۇل دەمالىس ورىندارىنا بارۋ مەن تۇرعىنداردىڭ بەتپەردە رەجيمىن ساقتاۋ بويىنشا ەپيدەمياعا قارسى شارالاردى ەلەمەۋى سالدارىنان بولدى»، – دەدى ج. بەكشين.
سونداي-اق COVID-19 اۋرۋىنىڭ ءوسۋىنىڭ نەگىزگى سەبەبى ينفەكسيانىڭ تەز تارالۋىنا ىقپال ەتەتىن مۋتاسيالانعان شتامداردىڭ بولۋىنا بايلانىستى.
سوندىقتان 22 ماۋسىمدا ەپيدەميولوگيالىق جاعدايدى باعالاۋ ماتريساسىندا الماتى تاعى دا «سارى» ايماققا ءوتتى. جۇقتىرۋ كورسەتكىشى جوعارى.
جانداربەك بەكشين ەپيدەميولوگيالىق جاعداي ۋشىققان جاعدايدا شەكتەۋ شارالارىن باقىلاۋ 5 كۇن ىشىندە جۇرگىزىلەتىنىن ءتۇسىندىردى («جاسىل» ايماقتان «سارىعا» نەمەسە «سارى» ايماقتان «قىزىلعا» كوشۋ). سوندىقتان الماتىدا «جاسىل» ايماق رەجيمى تاعى 5 كۇن، ياعني 27 ماۋسىمعا دەيىن ساقتالادى.