كوروناۆيرۋستىڭ دەلتا شتامىنىڭ ءوسۋى بارلىق ايماقتا تىركەلگەن.
قازاقستاننىڭ پرەمەر-مينيسترى اسقار مامين قازاقستان اۋماعىندا كوروناۆيرۋس ينفەكسيانىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆاك) وتىرىسىن وتكىزدى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
ەلدەگى سانيتارلىق-ەپيدەميولوگيالىق جاعداي تۋرالى دەنساۋلىق ساقتاۋ ءمينيسترى الەكسەي سوي، وڭىرلەردەگى احۋال تۋرالى نۇر-سۇلتان قالاسىنىڭ اكىمى التاي كولگىنوۆ، قاراعاندى وبلىسىنىڭ اكىمى جەڭىس قاسىمبەك، اتىراۋ وبلىسىنىڭ اكىمى ماحامبەت دوسمۇحامبەتوۆ، سونداي-اق شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان باياندادى.
قازاقستانداعى سانيتارلىق-ەپيدەميولوگيالىق جاعداي كۇردەلى. COVID-19-بەن سىرقاتتانۋشىلار سانى ارتۋدا. كوروناۆيرۋستىڭ دەلتا شتامىنىڭ ءوسۋى بارلىق ايماقتا تىركەلگەن. ۆيرۋستىڭ رەپرودۋكتيۆتىك يندەكسى – 1،2، ينفەكسيالىق توسەك-ورىن جۇكتەمەسى – 43%، رەانيماسيالىق توسەك-ورىن – 35%.
كوروناۆيرۋستىڭ تارالۋ قارقىنى بويىنشا 12 ءوڭىر «قىزىل ايماقتا» تۇر: نۇر-سۇلتان، الماتى جانە شىمكەنت قالالارى، اقمولا، اقتوبە، اتىراۋ، باتىس قازاقستان، قاراعاندى، قوستاناي، ماڭعىستاۋ، پاۆلودار جانە سولتۇستىك قازاقستان وبلىستارى.
«سارى ايماقتا» الماتى، جامبىل جانە قىزىلوردا وبلىستارى، «جاسىل ايماقتا» – شىعىس قازاقستان جانە تۇركىستان وبلىستارى تۇر.
بۇگىنگى تاڭدا 4،6 ملن-نان استام ادام نەمەسە ۆاكسينا الۋعا جاتاتىن ادامداردىڭ 46،5%-ى ءبىرىنشى كومپونەنتتى، 2،5 ملن-نان استام ادام ەكىنشى كومپونەنتتى الدى. حالىقتى ۆاكسينامەن قامتۋدىڭ ەڭ تومەن كورسەتكىشى ماڭعىستاۋ وبلىسىندا – 23،6%، باتىس قازاقستان جانە اقتوبە وبلىستارىندا 39%-دان بايقالادى.
ۆاك ەل بويىنشا سىرقاتتانۋشىلىق پەن ءولىم-جىتىمنىڭ 55%-ىن قۇرايتىن نۇر-سۇلتان جانە شىمكەنت قالالارىندا، قاراعاندى جانە اتىراۋ وبلىستارىندا كارانتيندىك شارالاردى قاتاڭداتۋ تۋرالى شەشىم قابىلدادى:
- Ashyq-قا قاتىساتىن وبەكتىلەردى قوسپاعاندا، قالاارالىق، وبلىسىشىلىك، قالالىق تۇراقتى جانە تۇراقتى ەمەس (تۋريستىك) اۆتوبۋس جانە ميكرواۆتوبۋس تاسىمالدارى ۋاقىتشا توقتاتىلادى. جابىق جاعاجايلار مەن اكۆاپاركتاردىڭ، اتتراكسيونداردىڭ قىزمەتى توقتاتىلادى.
- دەمالىس كۇندەرى اshyq-قا قاتىساتىنىنا قاراماستان، قوعامدىق كولىكتىڭ، سوسو-نىڭ، ساۋدا ۇيلەرىنىڭ، ساۋدا جەلىلەرىنىڭ، سپورت وبەكتىلەرىنىڭ (سپورت كەشەندەرىنىڭ، سپورت مەكتەپتەرىنىڭ، سپورت كلۋبتارىنىڭ، جاتتىعۋ زالدارىنىڭ)، قوعامدىق تاماقتانۋ وبەكتىلەرىنىڭ، فۋدكورتتاردىڭ (تاماق جەتكىزۋمەن جۇمىس ىستەۋگە رۇقسات ەتىلەدى)، فيتنەس-ورتالىقتاردىڭ، فيتنەس-كلۋبتاردىڭ، يوگا-ورتالىقتاردىڭ، سپورتتىق-ساۋىقتىرۋ نىساندارىنىڭ، ساۋنالاردىڭ، مونشالاردىڭ، سپا-ورتالىقتاردىڭ، باسسەيندەردىڭ، كينوتەاترلاردىڭ، تەاترلاردىڭ، كونسەرت زالدارىنىڭ، فيلارمونيالاردىڭ، سيركتەردىڭ، الاڭى 1000 م² اساتىن ازىق-تۇلىك ەمەس تاۋارلاردى ساتاتىن وبەكتىلەردىڭ، اشىق جانە جابىق بازارلاردىڭ، كومپيۋتەرلىك كلۋبتاردىڭ، بوۋلينگتەردىڭ، بيلياردتىڭ، كاراوكەنىڭ، تۇنگى كلۋبتاردىڭ، ءبىلىم بەرۋ ورتالىقتارىنىڭ، بالالار مەن ەرەسەكتەرگە ارنالعان ۇيىرمەلەردىڭ، بالالاردى دامىتۋ ورتالىقتارىنىڭ، بالالاردىڭ ويىن-ساۋىق ورتالىقتارىنىڭ، بانكتەردىڭ، حقكو-لاردىڭ، قازپوشتا بولىمشەلەرىنىڭ، ءدىني نىسانداردىڭ جۇمىسىنا تىيىم سالىنادى.
- جۇمىس كۇندەرى ساعات 17:00-گە دەيىن بالالار ويىن-ساۋىق ورتالىقتارىنىڭ (ويىن الاڭدارى، جابىق عيماراتتارداعى اتتراكسيوندار)، سوسو، ساۋدا ۇيلەرىنىڭ، ساۋدا جەلىلەرىنىڭ، اشىق جانە جابىق بازارلاردىڭ قىزمەتى شەكتەلگەن.
- جۇمىس كۇندەرى ساعات 17:00-گە دەيىن («Ashyq» قاتىسۋشىلارى – ساعات 20:00-گە دەيىن) قوعامدىق تاماقتانۋ وبەكتىلەرىنىڭ، فۋدكورتتاردىڭ، فيتنەس-ورتالىقتاردىڭ، فيتنەس-كلۋبتاردىڭ، يوگا-ورتالىقتاردىڭ، سپورتتىق-ساۋىقتىرۋ وبەكتىلەرىنىڭ، ساۋنالاردىڭ، سپا-ورتالىقتارىنىڭ، سپورت وبەكتىلەرىنىڭ، باسسەيندەردىڭ، كينوتەاترلاردىڭ قىزمەتى شەكتەلەدى.
- ۆاكسينا العان جانە سوڭعى 3 اي ىشىندە كوروناۆيرۋستان جازىلىپ شىققان ادامداردى قوسپاعاندا، بارلىق ۇيىمداردىڭ 80% قىزمەتكەرى ءۇشىن قاشىقتان جۇمىس ىستەۋ فورماتى ەنگىزىلەدى.
ۇكىمەت باسشىسى وڭىرلەردىڭ اكىمدىكتەرىنە، ورتالىق مەملەكەتتىك ورگاندارعا دەنساۋلىق ساقتاۋ جۇيەسىنىڭ رەسۋرستارىن جۇمىلدىرۋ، ونىڭ ىشىندە رەزەرۆتىك توسەك-ورىنداردى، دارى-دارمەكتەردى، جەكە قورعانىش قۇرالدارىن، مەديسينالىق جابدىقتار مەن كادرلاردى قامتاماسىز ەتۋ بويىنشا بارلىق شارالاردى قابىلداۋدى تاپسىردى. العاشقى مەديسينالىق-سانيتارلىق كومەك جۇمىسىنا ەرەكشە نازار اۋدارۋ كەرەك.
پرەمەر-مينيستر وڭىرلەردىڭ اكىمدىكتەرىنە، اسىرەسە، ماڭعىستاۋ، باتىس قازاقستان جانە اقتوبە وبلىستارىندا ۆاكسينالاۋ قارقىنىن كۇشەيتۋدى تاپسىردى.
