باتىر ۇشقىشتىڭ 100 جىلدىق مەرەيتويى اتالىپ ءوتتى.
28 پانفيلوۆشىلار ساياباعىندا ەكى مارتە كەڭەس وداعىنىڭ باتىرى تالعات بيگەلدينوۆتىڭ 100 جىلدىق مەرەيتويىنا وراي مەرەكەلىك شارا ۇيىمداستىرىلدى. ونداعى اسكەري شەرۋدە 800-دەن استام اسكەري قىزمەتكەر بوي كورسەتتى. ساياباق الاڭىنا اتى اڭىزعا اينالعان ۇشقىش-جاۋىنگەردىڭ مۋزەيلىك ەكسپوناتتارى، مۇراعات قۇجاتتارى قويىلدى. سونداي-اق، سيرەك كەزدەسەتىن قولجازبالارى مەن كىتاپتارى، سۋرەتتەردەن تۇراتىن تىڭ دۇنيەلەرى كوپشىلىك نازارىنا ۇسىنىلدى.
«تالعات بيگەلدينوۆ قازاقتىڭ ۇل-قىزدارىنا وشپەس ونەگەلى ءىزىن قالدىرعان. ول - كوك جۇزىندە قاھارماندىق ەرلىكتەردىڭ ەرەكشە ۇلگىسىن كورسەتىپ كەتكەن اتى اڭىزعا اينالعان داڭقتى تۇلعا. كەڭەس وداعىنىڭ باتىرى تالعات بيگەلدينوۆ سوعىستا ەكى جىلىن عانا وتكىزدى. وسى ۋاقىتتىڭ ىشىندە 305 اسكەري شابۋىلعا قارسى شىعىپ، كوپتەگەن كوماندالىق تاپسىرمالاردى ورىنداعان. بەرلين ءۇشىن جۇرگىزىلگەن شايقاستارعا قاتىسىپ، مىڭداعان جاۋىنگەرلەرمەن بىرگە ەلىمىزگە باتىر بولىپ ورالدى. كەلەشەك ۇرپاققا ءومىر ءسۇرۋدىڭ لايىقتى ۇلگىسىن قالدىردى. ءبىزدىڭ مىندەتىمىز – ونىڭ ءومىرى مەن قىزمەتىن كەيىنگى ۇرپاقتىڭ ماڭگى ەسىندە قالدىرۋ»، – دەدى مەدەۋ اۋدانىنىڭ اكىمى ەركەبۇلان ورازالين.
مەرەكەلىك ءىس-شارا اياسىندا قورعانىس مينيسترلىگى الماتى فيليالى اسكەري-تەحنيكالىق مەكتەبىنىڭ 130 تۇلەگى وتانعا ادال بولۋعا انت بەردى. جوعارى تەحنيكالىق مەكتەپ كۋرسانتتارى ەلىمىزدىڭ ەلەۋلى باتىرلارىن قۇرمەتتەپ، ەسكە الدى. وسى رەتتە مەكتەپ اسكەري-پاتريوتتىق تاربيە بەرۋدىڭ ورتالىعى بولا وتىرىپ، اسكەرگە شاقىرىلۋعا دەيىنگى جانە اسكەرگە شاقىرىلاتىن جاستاردى اسكەري-پاتريوتتىق تاربيەلەۋگە ۇلكەن كوڭىل بولەتىندىگىن دە ەرەكشە اتاپ وتكەنىمىز ءجون.
«بۇل شاراعا الماتى قالالىق گارنيزونىنىڭ بۇكىل اسكەري قىزمەتشىلەرى قاتىستى. ءىس-شارا جاقسى ءوتتى دەگەن ويدامىن. مەن ءوزىم حالىق قاھارمانى اتاعىن العان كەزىمدە مەن ول كىسىمەن ءبىر ساپتا تۇرعان ەدىم. تالعات بيگەلدينوۆ «وتان» وردەنىمەن ماراپاتتالعان ەدى. ول كىسىنى كورىپ، ديدارلاسۋ مەنىڭ ارمانىم بولاتىن. سول كەزدە قولىن الىپ، جىلى لەبىزىنە بولەنگەن ەدىم. ءبىز باتىرلارىمىزدى ەشقاشان ۇمىتپايمىز، جاستارىمىزعا ۇلگى-ونەگە كورسەتۋ ماقساتىندا وسىنداي ءىس-شارالارعا الىپ كەلەمىز. گۇل شوقتارىن قويدىرىپ، وسى اتالارىمىز سەكىلدى بولۋلارىنا تىلەك بىلدىرەمىز»، – دەيدى حالىق قاھارمانى، پودپولكوۆنيك ازامات ءجۇمادىلوۆ.
اتالمىش ءىس-شارانى گەنەرالدار كەڭەسى مەن «ۇوس ارداگەرلەرى، تىل ەڭبەككەرلەرى جانە سوعىس بالالارى كەڭەسى» قوعامدىق قورى ۇيىمداستىرعان.
«تالعات بيگەلدينوۆتىڭ 100 جىلدىعىنا وراي اسكەريلەر اراسىندا كوپتەگەن ءىس-شارالار، تاربيە ساعاتتارى ۇيىمداستىرىلدى. سونداي-اق، داڭقتى باتىردىڭ ەرلىك ىستەرى تۋرالى «اۋەگە كوتەرىلۋ» دەرەكتى ءفيلمى كورسەتىلدى. جاستاردىڭ شامشىراعىنا اينالعان اتامىزدىڭ مەرەيلى مەرەكەسى ەلىمىز بويىنشا جوعارعى دەڭگەيدە وتكىزىلەدى دەپ سەنىممەن ايتا الامىن. بولاشاقتا وسى الماتى قالاسىندا باتىردىڭ رۋحىنا ارناپ ەسكەرتكىش-تاقتا قويۋ ويىمىزدا بار. قالالىق اكىمدىككە ۇسىنىپ، ول كىسىلەردىڭ ماقۇلداۋىن كۇتەتىن بولامىز. الايدا، ول كىسىنىڭ جالعىز ءوزىنىڭ ەسكەرتكىشىن ەمەس، شابۋىلداۋشى ۇشقىشتار ت.بيگەلدينوۆ، ل.بەدا، ي.پاۆلوۆ جانە جويعىش ۇشاق ۇشقىشى س.لۋگانسكييدىڭ بىرىككەن ەسكەرتكىشىن قويامىز دەگەن ويدامىز»، – دەيدى ق ر قارۋلى كۇشتەرى اەرو-دەسانتتىق-شابۋىلداۋشى اسكەرلەر قولباسشىسىنىڭ تاربيە جانە يدەولوگيالىق جۇمىس جونىندەگى ورىنباسارى رادجان جانىسوۆ.
اسكەري اۋە جولدارىن باعىندىرعان، اسپان ادامى اتاعىنا يە بولعان قاھارمان اتامىزدىڭ ەسىمى الدەقاشان-اق سول اسپان بيىگىنە دەيىن شارىقتاپ كەتتى. انتالاعان جاۋعا تۇتقيىلدان سوققى بەرىپ، ەسەڭگىرەتكەن ەسىل ەر ءوز ومىرىندە 305 رەت كوككە كوتەرىلگەن ەكەن. شايقاستاردا ەرلىك كورسەتىپ، كەڭەس وداعىنىڭ باتىرى اتاعىن ەكى مارتە العان قازاق حالقىنىڭ ماقتانىشى. تالعات اعامىزدىڭ ارتىنان ەرگەن ۇرپاقتارى بۇگىنگى كۇنى ءوز ەستەلىكتەرىمەن ءبولىسىپ، بولاشاق ۇرپاققا باتىردىڭ تاباندىلىعى مەن قايراتكەرلىگىن بايان ەتۋدە.
«مەرەكەلىك ءىس-شاراعا اكەمنىڭ كوزىن كورگەن جاندار كەلىپ جاتىر. سىرباز ساربازداردىڭ ساپ تۇزەگەنىن كورىپ، كوڭىلىمىز جاندانىپ وتىر. ۇيىمداستىرۋشىلارعا ەرەكشە العىسىمدى بىلدىرەمىن. جىگىتتەرىمىزگە قاراپ ءبىزدىڭ قالامىز قانداي اسەم دەپ تاڭدانامىن. بەيبىت كۇندە ءومىر ءسۇرىپ جاتقانىمىزعا قاتتى قۋانامىن، سوعىس پەن قاقتىعىستار بولماسىن دەپ تىلەيمىن. جاستارىمىزدىڭ اكەمىز سەكىلدى ەرجۇرەك، باتىل، قايراتتى بولعاندارىن قالايمىن. سوعىس ءورتى سەيىلگەن بەيبىت جىلدارى تالعات جاقىپبەك ۇلى ازاماتتىق اۆياسيانى باسقاردى. ماسكەۋدەگى قۇرىلىس ينستيتۋتىن ءبىتىرىپ، ءزاۋلىم عيماراتتاردى تۇرعىزۋعا اتسالىستى. مىنە، ءبىزدىڭ اكەمىز وسىنداي جاۋىنگەر جان بولعانىنا قاتتى قۋانامىن. ەلىمىزدىڭ بارلىق جاستارى سول كىسى سەكىلدى بولعانىن قالايمىن»، – دەيدى قىزى گاليا بيگەلدينوۆا.
ماڭدايىنا ەرەكشە تاعدىر جازىلعان قازاقتىڭ وسىنداي اردا ازاماتى بولعانىنا ءبىز دە مىڭ دا ءبىر شۇكىرشىلىك ايتامىز.
«مەرەكەلىك كەشكە ەلىمىزگە ەلەۋلى تۇلعالار كەلدى. اتامىزدىڭ ونەگەلى ءومىر جولىنا قاراپ وتىرىپ، بىزدەر ۇلگى الامىز. مەنىڭ سۇيىكتى باتىرىم دا ءدال وسى كىسى. ۇلاعاتتى سوزدەرى مەنىڭ جادىمدا ماڭگى ساقتالادى. ءبىز تالعات اتامىزدىڭ ۇرپاعىمىز. ول كىسىنىڭ جولىمەن ءجۇرۋ ءبىزدىڭ بورىشىمىز. اعايىن-تۋىس، دوس-جاراندارىم ماعان تالعات اتامىزعا تۇر-كەلبەتىڭ، مىنەزىڭ ۇقسايدى دەپ جاتادى. سول سەبەپتەن، مەن باقىتتى ۇلانمىن دەپ ايتا الامىن»، – دەيدى لەيتەنانت ىڭكار التاي.
تالعات اتامىزدىڭ دوستارى مەن ارىپتەستەرىنىڭ ەستەلىكتەرىنە سۇيەنسەك، ول ومىردە اقجارقىن، قاراپايىم، وزىنەن كومەك سۇراپ كەلگەندەرگە ءاردايىم قول ۇشىن سوزىپ، كومەكتەسەتىن كەڭپەيىلدى ادام بولعان. تالعات بيگەلدينوۆ - قوعامعا تانىلىپ، حالىقتىڭ ماحابباتىن ءتىرى كەزىندە سەزىنىپ كەتكەن جان.