اقتوبە قالاسىنىڭ اسكەري داڭق مۇراجايىندا ەكسپوزيسيا اشىلدى.
قارۋلى كۇشتەردە اتى اڭىزعا اينالعان ۇشقىش-شابۋىلداۋشى، ۇلى وتان سوعىسىنىڭ داڭقتى ارداگەرى، اۆياسيا گەنەرال-مايورى تالعات جاقىپبەك ۇلى بيگەلدينوۆتىڭ بيۋستتەرىنە، ەسكەرتكىشتەرىنە جانە جەرلەنگەن جەرىنە گۇل شوقتارى قويىلىپ، سالتاناتتى راسىمدەر ءوتتى، دەپ حابارلايدى Almaty-akshamy.kz ق ر قورعانىس مينيسترلىگىنىڭ باسپا ءسوز قىزمەتىنە سۇيەنىپ.
نۇر-سۇلتاندا وتكەن جىلى ورناتىلعان ەسكەرتكىشكە گۇل شوقتارىن قويۋ راسىمىنە قورعانىس ءمينيسترى، گەنەرال-پولكوۆنيك رۋسلان جاقسىلىقوۆ، ونىڭ ورىنباسارلارى، قارۋلى كۇشتەر تۇرلەرىنىڭ باس قولباسشىلارى، اسكەر تەكتەرىنىڭ قولباسشىلارى، ارداگەرلەر، جەرگىلىكتى اتقارۋشى ورگاندار مەن قوعامدىق ۇيىمداردىڭ وكىلدەرى قاتىستى.
قورعانىس ۆەدومستۆوسىنىڭ باسشىسى ەكى مارتە كەڭەس وداعىنىڭ باتىرى تالعات بيگەلدينوۆتىڭ ەرلىك جولى، ونىڭ قازاقستاننىڭ ازاماتتىق جانە اسكەري اۆياسياسىن دامىتۋعا، ەلدىڭ مادەني نىساندارى مەن يندۋستريالىق ينفراقۇرىلىمىن سالۋعا قوسقان باعا جەتپەس ۇلەسىن اتاپ ءوتتى.
«اۆياسيا گەنەرال-مايورى تالعات جاقىپبەك ۇلى بيگەلدينوۆتىڭ ءومىر جولى – حح عاسىرداعى سۇراپىل سوعىستىڭ وشاعىنان وتكەن باتىرلىقتىڭ، قاجىماس قايراتتىڭ، تاباندىلىقتىڭ ايقىن ۇلگىسى. ءبىز، باتىردىڭ ءىزىن باسىپ كەلە جاتقان ۇرپاق جانە جاس بۋىن قازاق حالقىنىڭ باتىر ۇلىنىڭ جانقيارلىعىن ماقتان ەتىپ، ەرلىگىن جادىمىزدا ماڭگى ساقتايمىز»، – دەپ اتاپ ءوتتى قورعانىس ءمينيسترى.
وسى كۇنى اقتوبە قالاسىنىڭ اۋە قورعانىسى كۇشتەرى اسكەري ينستيتۋتىنداعى اسكەري داڭق مۇراجايىندا ەكسپوزيسيا اشىلدى. وندا بيگەلدينوۆتار وتباسىنىڭ جەكە مۇراعاتىنان الىنعان فوتوسۋرەتتەر، باتىر ءومىرىنىڭ كەي ساتتەرىنەن ەستەلىك-جادىگەرلەر قويىلعان.
اۋە قورعانىسى كۇشتەرى اسكەري ينستيتۋتى باسشىلىعىنىڭ ايتۋىنشا، مۇراجاي اقتوبەلىكتەردى جانە ورتالىق ازياداعى جالعىز اسكەري ۇشقىشتار دايىندايتىن ينستيتۋتتىڭ كۋرسانتتارىن تاربيەلەۋگە ىقپال ەتەدى.
عاسىرلىق مەرەيتويعا وراي اۋە قورعانىسى كۇشتەرىنىڭ باس قولباسشىسى، اۆياسيا گەنەرال-لەيتەنانتى نۇرلان ورمانبەتوۆ قارۋلى كۇشتەردىڭ ورتالىق اسكەري-تاريحي مۋزەيىنە ەلوردادا ورناتىلعان تالعات بيگەلدينوۆ ەسكەرتكىشىنىڭ شاعىن كوشىرمەسىن تاپسىردى. سالماعى 25 كەلىدەن اساتىن جارتى مەترلىك ءمۇسىن قولادان قۇيىلعانىن ايتا كەتكەن ءجون.