ق ر پرەمەر-مينيسترى ءاليحان سمايىلوۆ Harmony Capital Strategy AMC، Citius Capital AG، Torkam Holding جانە Marsel Group كومپانيالارىنىڭ باسشىلارىمەن كەزدەسۋ وتكىزدى.
ورتالىق مەملەكەتتىك ورگاندار باسشىلارىنىڭ قاتىسۋىمەن تۇرعىن ءۇي جانە مەديسينالىق مەكەمەلەر قۇرىلىسى، جاڭارتىلاتىن ەنەرگيا كوزدەرىن دامىتۋ، كولىك ينفراقۇرىلىمىن جاقسارتۋ جانە ت.ب. سالالارداعى جوبالاردى ىسكە اسىرۋ ماسەلەلەرى تالقىلاندى، دەپ حابارلايدى Almaty-akshamy.kz پرەمەر-مينيستردىڭ رەسمي اقپاراتتىق رەسۋرسىنا سىلتەمە جاساپ.
ءاليحان سمايىلوۆ ۇكىمەت ەلدەگى ىسكەرلىك كليماتتى جەتىلدىرۋگە ۇلكەن كوڭىل ءبولىپ وتىرعانىن جانە جاڭا ينۆەستيسيالىق باستامالارعا اشىق ەكەنىن اتاپ ءوتتى.
«ءبىز سىزدەردىڭ قازاقستاندا جوبالاردى جۇزەگە اسىرۋ بويىنشا نيەتتەرىڭىز بەن باستامالارىڭىزدى قۇپتايمىز»، — دەدى پرەمەر-مينيستر.
ءوز كەزەگىندە دەلەگاسيا باسشىسى، Harmony Capital Strategy AMC نەگىزىن قالاۋشى جانە Citius Capital AG باس ديرەكتورى كاسپار ۆونليچ جوسپارلانعان جوبالار بويىنشا ءقازىردىڭ وزىندە ءبىرقاتار دايىندىق جۇمىستارى جۇرگىزىلگەنىن اتاپ ءوتتى.
«ءبىز جۇمىس كەزدەسۋلەرىن وتكىزدىك، بىرنەشە رەت ايماقتارعا باردىق جانە قازاقستاندا ينفراقۇرىلىمدىق جوبالاردى قارجىلاندىرۋ بويىنشا زور الەۋەت بار دەپ سانايمىز»، — دەدى ول.
كەزدەسۋ قورىتىندىسى بويىنشا پرەمەر-مينيستر مەملەكەتتىك ورگاندارعا ينۆەستورلارمەن ىنتىماقتاستىقتى ودان ءارى دامىتۋ ءۇشىن كوتەرىلگەن بارلىق ماسەلەلەردى زەردەلەپ، پىسىقتاۋدى تاپسىردى.