اسكەريلەر تەكەلى قالاسىندا بولعان تج سالدارىن جويۋعا جۇمىلدىرىلدى

890  تەكشە مەتر بالشىق شىعارىلدى

الماتى وبلىسىنىڭ تەكەلى قالاسىنداعى تج سالدارىن جويۋعا ق ر تجم 28237 اسكەري ءبولىمىنىڭ 100 قىزمەتكەرى مەن 7 بىرلىك تەحنيكاسى جۇمىلدىرىلدى، دەپ حابارلايدى Almaty-akshamy.kz.

الماتى وبلىسى تجد باسپا ءسوز قىزمەتىنىڭ مالىمەتىنشە، اسكەري قىزمەتشىلەر جانە جەرگىلىكتى اتقارۋشى ورگانداردىڭ ارنايى تەحنيكاسى جەكە ۇيلەر مەن كوشەلەر اۋماعىنان بالشىق ماسساسىن تازارتۋ بويىنشا جۇمىستاردى جۇرگىزۋدە. 

16 مامىر كۇنى ساعات 17.00-دەگى جاعداي بويىنشا جالپى 890  تەكشە مەتر بالشىق شىعارىلدى، 81 رەيس جاسالدى. قازىرگى ۋاقىتتا قونايەۆ كوشەسى بالشىق ماسساسىنان تازارتىلدى.

«اۆاريالىق-قۇتقارۋ جانە كەزەك كۇتتىرمەيتىن جۇمىستاردى جۇرگىزۋگە الماتى وبلىسى ءتجد-نىڭ 8 قىزمەتكەرى مەن 3 تەحنيكاسى، پوليسيا ءبولىمىنىڭ 6 قىزمەتكەرى مەن 2 تەحنيكاسى، جەرگىلىكتى اتقارۋشى ورگانداردىڭ 20 قىزمەتكەرى مەن 10 تەحنيكاسى، 16 قىزمەتكەرى مەن 8 تەحنيكاسى، ونىڭ ىشىندە «قازسەلدەنقورعاۋ» ءمم-نىڭ 3 ساموسۆالى جۇمىلدىرىلدى»،-دەلىنگەن حابارلامادا.

ەستەرىڭىزگە سالا كەتەيىك، كەشە 2022 جىلدىڭ 15 مامىرىندا ساعات 12.10-دا الماتى وبلىسىنىڭ تەكەلى قالاسىندا (بالشىق ماسساسى، الدىن الا ۇزىندىعى 50 مەتر، ەنى 25 مەتر، بيىكتىگى 3،5 مەتر، كولەمى 4375 تەكشە مەتر) سۋ تاسقىنى بولدى. سالدارىنان 5 جاسار قىز قايتىس بولىپ، تۇرعىن ۇيلەر زارداپ شەكتى.