ۇقشۇ-نى بۇۇ-نىڭ بىتىمگەرشىلىك قىزمەتىمەن بايلانىستىرۋ مىندەتىن كۇن تارتىبىنە قويۋ قاجەت
قاسىم-جومارت توقايەۆ ۇجىمدىق قاۋىپسىزدىك تۋرالى شارتقا قول قويىلعانىنا 30 جىل جانە ۇيىمنىڭ قۇرىلعانىنا 20 جىل تولۋىنا وراي وتكەن ۇقشۇ-عا مۇشە مەملەكەتتەردىڭ ۇجىمدىق قاۋىپسىزدىك كەڭەسىنىڭ مەرەيتويلىق سەسسياسىنا قاتىستى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
مەرەيتويلىق جيىنعا قازاقستان كوشباسشىسىنان باسقا ارمەنيانىڭ پرەمەر-مينيسترى نيكول پاشينيان، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، رەسەي پرەزيدەنتى ۆلاديمير پۋتين، سونداي-اق ۇقشۇ-نىڭ باس حاتشىسى ستانيسلاۆ زاس قاتىستى.
قاسىم-جومارت توقايەۆ كەزدەسۋگە قاتىسقاندارعا ءىلتيپات ءبىلدىرىپ، مەرەيتويلىق سەسسيانى ۇيىمداستىرعانى ءۇشىن ۆلاديمير پۋتينگە ريزاشىلىعىن ءبىلدىردى.
قازاقستان پرەزيدەنتى ۇقشۇ-نىڭ 30 جىل ىشىندە ودان ءارى دامۋ ءۇشىن زور الەۋەتى بار كوپجاقتى ىنتىماقتاستىقتىڭ ناقتى مەحانيزمى رەتىندە قالىپتاسقانىن اتاپ ءوتتى.
قاسىم-جومارت توقايەۆ بەيبىتشىلىك پەن تۇراقتىلىقتى، حالىقارالىق جانە ايماقتىق قاۋىپسىزدىكتى ساقتاۋ، مۇشە مەملەكەتتەردىڭ اۋماقتىق تۇتاستىعى مەن ەگەمەندىگىن قورعاۋ ۇقشۇ-نىڭ باستى مىندەتى ەكەنىن ايتتى. پرەزيدەنت ۇقشۇ-نىڭ تۇراقتى جۇمىس ورگاندارىنىڭ تابىستى قىزمەتىنە، ءارتۇرلى فورماتتاعى تىعىز ىنتىماقتاستىقتى، سونداي-اق ۇيىمنىڭ كۇشتىك، قۇقىق قورعاۋ جانە بىتىمگەرشىلىك الەۋەتىن كۇشەيتۋ ماسەلەسىنە توقتالدى.
مەملەكەت باسشىسى سويلەگەن سوزىندە حالىقارالىق تەرروريزم مەن ەكسترەميزمگە، زاڭسىز ەسىرتكى جانە قارۋ-جاراق اينالىمىنا، كوشى-قونعا، سونىڭ ىشىندە اۋعانستانداعى احۋالدىڭ ورشۋىنە قارسى ءىس-قيمىل ماسەلەلەرىنە ەرەكشە نازار اۋداردى.
«اۋعانستانداعى جاعداي، سونداي-اق وسى ەلدىڭ اۋماعىنداعى قارۋلى توپتاردىڭ بەلسەندى ارەكەتى مەملەكەتتەرىمىزدىڭ قاۋىپسىزدىگى مەن تۇراقتىلىعىنا قاتەر ءتوندىرىپ وتىر. ۇقشۇ بارلىق ىقتيمال قاۋىپ-قاتەرلەردى ەسكەرىپ، ورتالىق ازيانىڭ وڭتۇستىك شەكارالارىنىڭ قاۋىپسىزدىگىن قامتاماسىز ەتۋگە كوبىرەك كوڭىل ءبولۋى كەرەك دەپ ەسەپتەيمىن»، – دەدى قازاقستان پرەزيدەنتى.
قاسىم-جومارت توقايەۆ ۇقشۇ بىتىمگەرشىلىك كۇشتەرىنىڭ الەۋەتىن نىعايتۋ ۇيىم قىزمەتىنىڭ تاعى ءبىر وزەكتى مىندەتى ەكەنىن ايتتى.
«ءبىزدىڭ ويىمىزشا، ءقازىردىڭ وزىندە ۇقشۇ-نى بۇۇ-نىڭ بىتىمگەرشىلىك قىزمەتىمەن بايلانىستىرۋ مىندەتىن كۇن تارتىبىنە قويۋ قاجەت. بۇل قادام ۇجىمدىق قاۋىپسىزدىك شارتى ۇيىمىنىڭ سۋبەكت رەتىندەگى قۇقىعىن نىعايتادى. سونداي-اق ۇيىمنىڭ بەيبىتشىلىكتى ساقتاۋ جونىندەگى حالىقارالىق بىتىمگەرشىلىك وپەراسيالارعا قاتىسۋ تاجىريبەسىن قامتاماسىز ەتەدى»، – دەدى مەملەكەت باسشىسى.
كەزدەسۋ قورىتىندىسى بويىنشا ۇقشۇ-عا مۇشە مەملەكەتتەردىڭ باسشىلارى ۇجىمدىق قاۋىپسىزدىك كەڭەسىنىڭ مەرەيتويلىق مالىمدەمەسىن قابىلدادى.