اسكەريلەر قان تاپسىرۋ اكسياسىن وتكىزدى

ءبىر كۇندە اسكەري قىزمەتشىلەر 45 ليتر قان تاپسىردى.

ۇلتتىق قورعانىس ۋنيۆەرسيتەتىنىڭ اسكەري قىزمەتشىلەرى دونور بولۋعا  باستاما كوتەردى. قايىرىمدىلىق شاراسىن ۇيىمداسقان تۇردە ءارى ىڭعايلى وتكىزۋ ماقساتىمەن اسكەري وقۋ ورنىنا استانالىق قان ورتالىعىنىڭ قىزمەتكەرلەرى ارنايى كەلدى، دەپ حابارلايدى Almaty-akshamy.kz.

اسكەري-گۋمانيتارلىق عىلىمدار فاكۋلتەتىنىڭ 1 كۋرس ماگيسترانتتارىنىڭ بۇل باستاماسى ارىپتەستەرى تاراپىنان قىزۋ قولداۋ تاۋىپ، اكسياعا 100 ادام قاتىستى.

– ءبىز قيىن جاعدايعا تاپ بولىپ، شۇعىل كومەككە مۇقتاج ادامدارعا كومەكتەسۋدى شەشتىك. دوستارىمىز بەن جاقىندارىمىزدان قان قورى وتە قۇندى رەسۋرس ەكەنىن بىلەمىز. ءبىزدىڭ بۇل يگى باستامامىز ادام ءومىرىن ساقتاپ قالۋعا قوسقان ۇلەسىمىز بولسىن، – دەپ اتاپ ءوتتى ۇلتتىق قورعانىس ۋنيۆەرسيتەتىنىڭ تىڭداۋشىسى پودپولكوۆنيك ميراس ىزتىلەۋوۆ.

قان ورتالىعى قىزمەتكەرلەرى ۋنيۆەرسيتەتتىڭ مەديسينالىق قىزمەتىمەن بىرلەسىپ، وقۋ ورنىندا بارلىق سانيتارلىق تالاپتارعا سايكەس كەلەتىن قابىلداۋ پۋنكتىن اشتى. مەديسينالىق مەكەمە وكىلدەرى اتاپ وتكەندەي، ولاردى اسكەري ادامداردىڭ بەلسەندىلىگى تاڭ قالدىردى.

ءبىر كۇندە اسكەري قىزمەتشىلەر 45 ليتر قان تاپسىردى. دونورلاردىڭ پىكىرىنشە، مۇنداي اكسيالار تۇراقتى نەگىزدە وتكىزىلىپ تۇرۋى كەرەك.