بىلتىر ەلىمىزدە كەدەيلەر ۇلەسى 4،9% بولسا، بيىل 5،1%-عا جەتتى
قازاقستاندا كەدەيلىك دەڭگەيى بىلتىرعا قاراعاندا كوتەرىلە تۇسكەن. اتالعان دەرەكتى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا كەلتىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بىلتىر ەلىمىزدە كەدەيلەر ۇلەسى 4،9% بولسا، بيىل 5،1%-عا جەتتى. دەمەك، كەدەيلەر سانى ارتقان. جوعارى ينفلياسيا ازاماتتاردىڭ تابىسىنا ايتارلىقتاي اسەر ەتتى. تاپقان تابىستىڭ دەنى (60-70%) ازىق-تۇلىككە جۇمسالادى. ناتيجەسىندە وتباسىنى ودان ءارى دامىتۋعا قارجى جەتپەيدى. ارينە، كۇنكورىس دەڭگەيىنىڭ ازايا ءتۇسۋى ءار وتباسىعا اسەر ەتەدى»، - دەيدى تامارا دۇيسەنوۆا ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ودان ءارى مينيستر قانداستاردى قولداۋعا قاتىستى ويىن ورتاعا سالدى، دەپ جازدى قازاقپارات.
«الەمدە ەتنيكالىق يمميگراسيامەن اينالىساتىن ءتورت ەل بار، سونىڭ ءبىرى – قازاقستان. بۇل قاتاردا بىزدەن بولەك، يزرايل، پولشا جانە گەرمانيا بار. ەتنيكالىق قانداستارعا ارنالعان جوبانى ازىرلەۋ بارىسىندا اتالعان ەلدەردىڭ تاجىريبەسى ەسكەرىلدى. وعان سايكەس وزگە ەلدەن كەلگەن قانداستاردى وتانىنا بەيىمدەۋ ماقساتىندا ءتۇرلى الەۋمەتتىك قولداۋ، كومەك كورسەتىلەدى، ياعني تۇرعىن ءۇي جانە ەڭبەكپەن قامتۋ دەگەن سەكىلدى. ءبىزدىڭ قانداستارىمىزعا ۇسىناتىن الەۋمەتتىك كومەگىمىز كوپ تە، از دا ەمەس. ولاردىڭ وتانىنا بەيىمدەلۋى ءۇشىن كورسەتىلەتىن العاشقى كومەك دەۋگە بولادى»، - دەيدى ۆەدومستۆو باسشىسى.