وقۋ-جاتتىعۋعا اسكەري-تەڭىز كۇشتەرىنىڭ باس قولباسشىسى ساكەن بەكجانوۆ باسشىلىق ەتۋدە.
كاسپيي تەڭىزىنىڭ قازاقستاندىق سەكتورىندا اسكەري تەڭىزشىلەر زىمىران-ارتيللەريالىق كورابلدەر توپتارىن جاۋىنگەرلىك جاعدايدا قولدانۋ ءىس-قيمىلدارىن پىسىقتاۋدا، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ق ر قورعانىس مينيسترلىگىنىڭ باسپا ءسوز قىزمەتىنەن ءمالىم ەتكەندەي، قارۋلى كۇشتەردە جاۋىنگەرلىك وقۋ شارالارى قازاقستان پرەزيدەنتىنىڭ ارميانىڭ جاۋىنگەرلىك قابىلەتىن تۇبەگەيلى ارتتىرۋ جونىندەگى تاپسىرماسىن ىسكە اسىرۋ شەڭبەرىندە وتكىزىلۋدە. وقۋ-جاتتىعۋعا اسكەري-تەڭىز كۇشتەرىنىڭ باس قولباسشىسى، كونتر-ادميرال ساكەن بەكجانوۆ باسشىلىق جاساۋدا»، - دەلىنگەن مينيسترلىك مالىمەتىندە.
مانيەۆرلەر بارىسىندا ەكيپاجداردىڭ دايىندىق دەڭگەيى جەتىلدىرىلۋدە. سونداي-اق كاسپيي تەڭىزىنىڭ قازاقستاندىق سەكتورىندا ەلدىڭ اۋماقتىق تۇتاستىعىن، ەگەمەندىگىن جانە ەكونوميكالىق مۇددەلەرىن قورعاۋ جونىندەگى مىندەتتەردى ورىنداۋداعى ءوزارا ءىس-قيمىل ءتارتىبى پىسىقتالىپ جاتىر.
«وقۋ-جاتتىعۋدا تەڭىزدە اپاتقا ۇشىراعان كەمەگە كومەك كورسەتۋ بويىنشا ەكيپاجداردىڭ قۇتقارۋ ءىس-قيمىلدارىنا ەرەكشە نازار اۋدارىلعان. بۇدان بولەك، اسكەري تەڭىزشىلەر كەمەلەردى ديۆەرسياعا قارسى قورعاۋ، ۇشقىشسىز باسقارىلاتىن اپپاراتتار مەن شارتتى قارسىلاستىڭ كاتەرلەرىنە قارسى تۇرۋ شارالارىن جۇرگىزۋ ۇستىندە»، - دەپ ناقتىلادى ۆەدومستۆودان.