تەڭدىك جانە اسكەري قاجەتتىلىك
الماتى قالاسىنىڭ بىتىمگەرلىك وپەراسيالار ورتالىعىندا قورعانىس مينيسترلىگى مەن حالىقارالىق قىزىل كرەست كوميتەتىنىڭ قازاقستان رەسپۋبليكاسىنداعى ميسسياسى اراسىنداعى ەكىجاقتى ىنتىماقتاستىق جوسپارىنا سايكەس قارۋلى قاقتىعىستار قۇقىعى تاقىرىبىندا كۋرس ۇيىمداستىرىلدى، دەپ حابارلايدى Almaty-akshamy.kz.
كۋرستىڭ اشىلۋ سالتاناتىندا قورعانىس مينيسترلىگىنىڭ بىتىمگەرلىك وپەراسيالار ورتالىعىنىڭ باستىعى، پولكوۆنيك باۋىرجان نىعمەتۋللين اسكەري قىزمەتشىلەردىڭ حالىقارالىق گۋمانيتارلىق قۇقىق سالاسىنان حاباردار بولۋ دەڭگەيىن ارتتىرۋعا قوسقان ۇلەسى ءۇشىن حالىقارالىق قىزىل كرەست كوميتەتى ميسسياسىنىڭ وكىلدەرىنە العىسىن ءبىلدىردى.
ءوز كەزەگىندە، قازاقستان رەسپۋبليكاسىنداعى حالىقارالىق قىزىل كرەست كوميتەتى ميسسياسىنىڭ باسشىسى جەلكو لەجايا كۋرس وتكىزەتىن ورىن ۇسىنعانى ءۇشىن ورتالىق باسشىلىعىنا العىسىن ءبىلدىردى.
كۋرس بارىسىندا قارۋلى كۇشتەردىڭ، ءىىم، تجم جانە ۇقك شەكارا قىزمەتىنىڭ اسكەري قىزمەتشىلەرى بۇۇ بىتىمگەرشىلىك وپەراسيالارىندا قولدانىلاتىن حالىقارالىق گۋمانيتارلىق قۇقىق نورمالارىمەن، سوعىس جۇرگىزۋدە تىيىم سالىنعان قۇرالدارىمەن، تەڭدىك جانە اسكەري قاجەتتىلىك، سونداي-اق مادەني قۇندىلىقتاردى قورعاۋ قاعيداتتارىمەن تانىسادى.
كۋرس اياقتالعاننان كەيىن تىڭداۋشىلارعا سەرتيفيكاتتار تابىس ەتىلەدى.