قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى الىبەك قۋانتىروۆ جانە «Kazakh Invest» ۇك» اق باسقارما ءتوراعاسىنىڭ ورىنباسارى ماديار سۇلتانبەك قازاقستانداعى «Mitsubishi Corporation» باس ديرەكتورى تەسۋيا سۋگيتامەن كەزدەسۋ وتكىزدى.
كەلىسسوزدەر بارىسىندا ءا.قۋانتىروۆ قازاقستاننىڭ جاڭا ينۆەستيسيالىق ساياساتى ودان ءارى ەكسپورتقا باسا نازار اۋدارا وتىرىپ، قوسىلعان قۇنى جوعارى وندىرىستەردى دامىتۋعا باعىتتالعانىن اتاپ ءوتتى. وسىعان بايلانىستى وزىق جاپون تەحنولوگيالارى كادرلىق جانە تەحنولوگيالىق الەۋەتتى نىعايتۋدا ماڭىزدى ءرول اتقارا الادى، دەپ حابارلايدى aqshamnews.kz سىرتقى ىستەر مينيسترلىگىنە سىلتەمە جاساپ.
كەزدەسۋ بارىسىندا «Mitsubishi Corporation» وكىلدەرى تۇراقتى دامۋ مەن كومىرتەگى ءىزىن ازايتۋعا باعىتتالعان 2024 جىلعى كورپوراتيۆتىك ستراتەگياسىن ۇسىندى. كەزدەسۋ اياسىندا قازاقستاندىق تاراپقا سۋتەگى تەحنولوگيالارىن پايدالانۋ ءۇشىن ينفراقۇرىلىم قۇرۋ جانە جاڭارتىلاتىن ەنەرگەتيكا سالاسىندا شەشىمدەر ازىرلەۋ سياقتى پەرسپەكتيۆالى جوبالار ۇسىنىلدى. وسىعان بايلانىستى، كومپانيانىڭ ەنەرگەتيكالىق يننوۆاسيالارعا، سيفرلىق ترانسفورماسياعا جانە جوعارى تەحنولوگيالىق وندىرىسكە بەرەتىن ماڭىزى قازاقستاننىڭ تومەن كومىرتەكتى ەكونوميكانى دامىتۋ جونىندەگى ماقساتتارىنا تولىق سايكەس كەلەدى.
تاراپتار ورنىقتى دامۋ سالاسىنداعى ىنتىماقتاستىقتىڭ نەگىزگى باعىتتارىن، ونىڭ ىشىندە ەنەرگەتيكا سەكتورىندا، ينفراقۇرىلىمدا جانە ونەركاسىپتە وزىق تەحنولوگيالاردى ەنگىزۋ مەن جوبالاردى ىسكە اسىرۋدى تالقىلادى. «Mitsubishi Corporation» وكىلدەرى كومپانيانىڭ قازاقستانداعى قاتىسۋىن كەڭەيتۋگە جانە ءوڭىردىڭ تۇراقتى دامۋىن قولداۋعا باعىتتالعان جاڭا باستامالاردى ىسكە اسىرۋعا قىزىعۋشىلىق ءبىلدىردى. بۇعان دەيىن «C5+جاپونيا» بيزنەس-فورۋمى اياسىندا «Mitsubishi Corporation» كومپانياسى «Central Asia Climate Foundation» جانە «Rakurs Tech LLC» كومپانيالارىمەن ءوزارا تۇسىنىستىك تۋرالى مەموراندۋمعا قول قويدى.
كەزدەسۋ قورىتىندىسى بويىنشا تاراپتار كومپانيانىڭ ەنەرگەتيكالىق جانە سيفرلىق ترانسفورماسيا سالاسىنداعى جاھاندىق باستامالارىن ەسكەرە وتىرىپ، ىنتىماقتاستىقتى دامىتۋعا كەلىستى.
انىقتاما: 1993 جىلدان باستاپ «Mitsubishi Corporation» قازاقستاندا ءۇش وكىلدىك اشتى. ەلىمىزدە جۇمىس ىستەگەن جىلدارى كورپوراسيا ءبىرقاتار ينۆەستيسيالىق جوبالاردى ىسكە اسىرۋعا قاتىستى: «باتىس قازاقستانداعى اۆتوموبيل جولدارىن وڭالتۋ»، «قىزىلوردا قالاسىن سۋمەن جابدىقتاۋدى قايتا قۇرۋ جانە جاقسارتۋ»، «تەمىر جولداردى جوندەۋ ءۇشىن تەحنيكا جەتكىزۋ» جانە ت.ب. توكيو قالاسىنداعى باس كەڭسەنىڭ مالىمەتىنشە، كورپوراسيا «تەڭىزشيەۆرويل» جانە «اقتوبەمۇنايگاز» كومپانيالارىنا كورروزياعا قارسى تۇراقتىلىعى جوعارى 30 مىڭ توننا بولات قۇبىر جەتكىزگەن. ادامي رەسۋرستاردى دامىتۋ جونىندەگى قىزمەت شەڭبەرىندە «Mitsubishi Corporation» زاماناۋي جابدىقتارمەن جابدىقتالعان قبتۋ-دىڭ بىرنەشە وقۋ جانە عىلىمي زەرتحانالارىنىڭ اشىلۋىنا دەمەۋشىلىك جاسادى.