ق ر قورعانىس مينيسترلىگى قورعانىس ۆەدومستۆوسى باسشىسىنىڭ «2024 جىلى اسكەري مىندەتتىلەردى اسكەري جيىندارعا شاقىرۋ تۋرالى» بۇيرىعىنىڭ جوباسىن ازىرلەدى.
نورماتيۆتىك قۇقىقتىق اكت «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» ق ر زاڭى 33-بابىنىڭ 1) تارماقشاسىنا سايكەس دايىندالدى. ءىس-شارالاردى اسكەري باسقارۋ ورگاندارى، اسكەري دايىندىق جونىندەگى ۋاكىلەتتى مەملەكەتتىك ورگاندار اسكەري مىندەتتىلەر مەن ازاماتتاردىڭ ءبىلىمىن جەتىلدىرۋ ماقساتىندا، سونداي-اق ەل زاڭناماسىندا كوزدەلگەن وزگە دە جاعدايلاردا جۇرگىزەدى.
جيىنداردىڭ ماقساتى – بەيبىت ۋاقىتتا قىسقارتىلعان كولەمدە ۇستالاتىن اسكەري بولىمدەردىڭ جاۋىنگەرلىك جانە جۇمىلدىرۋ دايىندىعىن ارتتىرۋ، جۇمىلدىرۋ جانە ولاردى سوعىس ۋاقىتىندا جاساقتاۋ اۋداندارىندا جاساقتاۋ كەزىندە قارۋلى كۇشتەردى، باسقا دا اسكەرلەر مەن اسكەري قۇرالىمداردى ورىستەتۋگە قاجەتتى اسكەري-وقىتىلعان رەسۋرستاردى دايىنداۋ جانە زاپاستا جيناقتاۋ.
30 كۇندىك اسكەري جيىندار 2007 جىلدان باستاپ جىل سايىن وتكىزىلىپ كەلەدى. جيىن كەزىندە اسكەري مىندەتتىلەردىڭ جۇمىس ورنى مەن اتقاراتىن لاۋازىمى ساقتالادى. ولارعا ورتاشا جالاقى، ال جۇمىسسىزدارعا مەملەكەت ەسەبىنەن ەڭ تومەنگى جالاقى تولەنەدى. اسكەري مىندەتتىلەردى تەمىرجول نەمەسە اۆتوموبيل كولىگىمەن تاسىمالداۋ، ولاردى تاماقپەن قامتاماسىز ەتۋ ق ر قورعانىس مينيسترلىگىنىڭ قاراجاتى ەسەبىنەن جۇزەگە اسىرىلادى. بۇدان بولەك اسكەري جيىندارعا شاقىرىلعان بارلىق اسكەري مىندەتتىلەر اسكەري مىندەتتىلەردىڭ ءتيىستى ساناتتارى ءۇشىن بەلگىلەنگەن نورمالارعا سايكەس زاتتاي مۇلىكپەن جانە اسكەري قىزمەتشىلەرمەن تەڭ دارەجەدە مەديسينالىق قىزمەتپەن قامتاماسىز ەتىلەدى. جيىنعا شاقىرىلعان بارلىق اسكەري مىندەتتىلەر كازارمالىق جاعدايدا بولادى. ولاردى ءبولىمنىڭ ورنالاسقان جەرىنەن سەيىلگە شىعۋىن روتا كومانديرلەرى ىشكى قىزمەت جارعىسىندا بەلگىلەنگەن تارتىپپەن جۇرگىزەدى.
اسكەري ءتارتىپ پەن قوعامدىق ءتارتىپتى بۇزعانى، قىلمىس جاساعانى، سونداي-اق مەملەكەتكە كەلتىرگەن ماتەريالدىق زالالى ءۇشىن اسكەري جيىندارعا شاقىرىلعان اسكەري مىندەتتىلەر ەلدىڭ زاڭناماسىنا سايكەس جاۋاپقا تارتىلادى. اسكەري مىندەتتىلەردىڭ اسكەري جيىنداردان جالتارۋى اكىمشىلىك قۇقىق بۇزۋشىلىق تۋرالى كودەكسكە سايكەس بەس ايلىق ەسەپتىك كورسەتكىش مولشەرىندەگى ايىپپۇل سالۋعا اكەپ سوعادى.
بۇيرىق جوباسىنىڭ تولىق ماتىنىمەن «ەلەكتروندىق ۇكىمەت» پورتالىندا «اشىق نقا» بولىمىندە اعىمداعى جىلدىڭ 23 قاڭتارىنا دەيىن مىنا سىلتەمە بويىنشا تانىسۋعا بولادى: https://legalacts.egov.kz/npa/view؟id=14887705