جاقسىلىق ۇشكەمپىروۆ اتىنداعى جەكپە-جەك سارايىندا ۇلتتىق كۇرەستەن وتكەن "دالا قىراندارى" رەيتينگتىك ءتۋرنيرى سەگىز سالماق دارەجەسىندە قازاقستاننىڭ ەڭ مىقتى دەگەن بالۋاندارىن انىقتادى، دەپ حابارلايدى aqshamnews.kz.
ق ر قورعانىس مينيسترلىگىنىڭ مالىمەتىنشە، بوز كىلەمدە ارميا ورتالىق سپورت كلۋبىنىڭ سپورتشىلارى نۇرداۋلەت باقتىباي ۇلى مەن قاتارداعى جاۋىنگەر ەراسىل جاناتايەۆ جوعارى ناتيجە كورسەتتى.
جىل باستالعالى بەرى قازاقستاندا قازاق كۇرەسىنەن بەس رەيتينگتىك جارىس ءوتتى. ولاردىڭ قورىتىندىسى بويىنشا ءار سالماق دارەجەسىندە ەڭ كوپ ۇپاي جيناعان سەگىز بالۋان انىقتالدى.
جارىس بارىسىندا كىلەمگە بىرنەشە دۇركىن الەم چەمپيوندارى، V دۇنيەجۇزىلىك كوشپەندىلەر ويىندارى مەن دۇنيەجۇزىلىك جەكپە-جەك ويىندارىنىڭ جەڭىمپازدارى، ازيا كۋبوگىنىڭ يەگەرلەرى، "قازاقستان بارىسى" ءتۋرنيرىنىڭ جانە بۇعان دەيىنگى "دالا قىراندارى" تۋرنيرلەرىنىڭ جەڭىمپازدارى شىقتى.
جارىس قورىتىندىسى بويىنشا سەگىز سپورتشى "دالا قىراندارى" تۋرنيرىندە "باس بالۋان" اتاعىنا يە بولدى. ونىڭ جۇلدە قورى 100 000 دوللار.
ارميا سپورتىنىڭ وكىلدەرى ەكى سالماق دارەجەسىندە جەڭىسكە جەتتى. قارۋلى كۇشتەردىڭ قىزمەتكەرى نۇرداۋلەت باقتىباي ۇلى 82 كگ سالماقتا جانە مەرزىمدى قىزمەت ساربازى ەراسىل جاناتايەۆ 90 كگ سالماق دارەجەسىندە جەڭىس تۇعىرىنان كورىندى.
– مەنىڭ ويىمشا، بۇل جاقسى ناتيجە. ءبىزدىڭ ەكى سپورتشى چەمپيون اتاندى، – دەدى ارميا ورتالىق سپورت كلۋبى قازاق كۇرەسى كومانداسىنىڭ باستىعى لەيتەنانت اسان مامبەتقۇلوۆ. بۇل سپورتشىلار الداعى تامىز ايىندا قازاق كۇرەسىنەن اسكەري قىزمەتشىلەر اراسىنداعى العاشقى CISM الەم چەمپيوناتىندا قارۋلى كۇشتەردىڭ نامىسىن قورعايدى.