پاۆلودار وبلىسىندا «Turkey PVL» ج ش س قۇس فابريكاسىنىڭ قۇرىلىسىنىڭ ەكىنشى كەزەڭىن اياقتادى.
«Turkey PVL» – وڭىردە كۇركەتاۋىق ەتىن وندىرۋگە ماماندانعان جالعىز كاسىپورىن. كومپانيانىڭ ءونىمى قازاقستاندا «پاۆلودار كۇركەتاۋىعى» برەندىمەن تانىمال، دەپ حابارلايدى aqshamnews.kz.
كاسىپورىن ۆەرتيكالدى ينتەگراسيالانعان: كۇركەتاۋىقتارعا ارنالعان جەم وزدەرىنىڭ قۇراما جەم زاۋىتىندا وندىرىلەدى، قۇس ءوسىرۋ مەن ينكۋباسياسى دا كاسىپورىننىڭ ءوز ىشىندە جۇزەگە اسىرىلادى. بۇل ءوندىرىستىڭ بارلىق كەزەڭدەرىندە جوعارى ساپانى قامتاماسىز ەتۋگە مۇمكىندىك بەرەدى.
2025 جىلدىڭ باسىندا كاسىپورىنداعى قۇس باسى سانى 95 مىڭدى قۇرادى، ال ءوندىرىس كولەمى 3 مىڭ تونناعا جەتتى. كومپانيا ءوندىرىس قۋاتىن ارتتىرۋ جۇمىستارىن جالعاستىرۋدا: 2024 جىلى فابريكادا جىلدىق قۋاتتىلىعى 3،5 مىڭ توننا بولاتىن 10 قۇس قوراسى پايدالانۋعا بەرىلدى.
جالپى، ينۆەستيسيالىق جوبانى تولىق جۇزەگە اسىرعاننان كەيىن قۇس فابريكاسىنىڭ جىلدىق قۋاتتىلىعى 8 مىڭ تونناعا جەتەدى.