الماتىدا "اشىق اسپان استىنداعى كينوكورسەتىلىم” جوباسى ءوز جۇمىسىن باستادى دەپ حابارلايدى aqshamnews.kz. جاستار ساياساتى باسقارماسىنىڭ قولداۋىمەن، قالا ۆولونتەرلەرىنىڭ باستاماسىمەن جۇزەگە اسىپ جاتقان بۇل جوبا – قالا تۇرعىندارى مەن جاستارىنا جاز مەزگىلىن قىزىقتى ءارى پايدالى وتكىزۋدىڭ تاپتىرماس مۇمكىندىگى.
ەرەكشە فورماتتاعى بۇل باستاما – قالاداعى مادەني دەمالىستى قولجەتىمدى ەتىپ قانا قويماي، وتاندىق كينويندۋستريانى ناسيحاتتاۋ مەن تانىمال ەتۋگە باعىتتالعان. ۇيىمداستىرۋشىلاردىڭ ايتۋىنشا، كينوكورسەتىلىمدەر الماتىنىڭ بارلىق 8 اۋدانىندا اپتا سايىن وتەتىن بولادى. بۇل – ءار اۋدان تۇرعىندارىنا ساپالى كينوتۋىندىلاردى تەگىن تاماشالاۋعا جول اشاتىن تاماشا مۇمكىندىك.
جوبانىڭ اشىلۋ كەشىندە ءسوز سويلەگەن الماتى قالاسى ۆولونتەرلەر ءفرونت-وفيسىنىڭ جەتەكشىسى باعدات اناربايەۆا كينوكورسەتىلىمنىڭ ماڭىزدىلىعىنا توقتالىپ، بۇل باستامانىڭ قوعاممەن بايلانىس ورناتۋداعى ءرولىن ەرەكشە اتاپ ءوتتى:
– بۇگىن ءبىز قالا تۇرعىندارى ءۇشىن ەرەكشە اتموسفەرا سىيلايتىن “اشىق اسپان استىنداعى كينوكورسەتىلىمدەردى” باستاپ جاتىرمىز. بۇل تەك فيلم كورۋ عانا ەمەس – بۇل ادامدار اراسىنداعى بايلانىس، اشىق ديالوگ، مادەنيەت پەن وتاندىق ونەرگە قۇرمەت. ەندى ءار اپتا سايىن قالامىزدىڭ ءار اۋدانىندا وتاندىق فيلمدەردى كورەرمەن نازارىنا ۇسىنامىز. ۆولونتەرلەردىڭ بەلسەندىلىگى مەن قوعامعا پايداسى وسىنداي جوبالار ارقىلى ودان ءارى ارتا تۇسەدى دەپ سەنەمىز، – دەدى ول.
كەشكە قاتىسقان كورەرمەندەردىڭ دە اسەرى ەرەكشە. جاستار ءۇشىن مۇنداي ءىس-شارالار ءوزارا تانىسۋعا، ورتاق قىزىعۋشىلىق تابۋعا، رۋحاني بايىپ، بوس ۋاقىتىن ءتيىمدى وتكىزۋگە مۇمكىندىك بەرەدى. كەشكە العاش رەت قاتىسقان قالا تۇرعىنى، ستۋدەنت ايزەرە قالي بىلاي دەپ پىكىر ءبىلدىردى:
– مۇنداي ءىس-شارالار – ءبىز سەكىلدى جاستار ءۇشىن ۇلكەن موتيۆاسيا. بىرىنشىدەن، وتاندىق كينونى قولدايمىز، ەكىنشىدەن، تابيعات اياسىندا، اشىق اسپان استىندا ۋاقىت وتكىزۋ – ەرەكشە اسەر سىيلايدى. مەن بۇگىن ءوزىم ءۇشىن جاڭاشا ەموسيا الدىم. وسىنداي فورماتتاعى مادەني كەشتەر ءجيى ءوتىپ تۇرسا ەكەن، – دەيدى ايزەرە.
ايتا كەتەيىك، الماتى قالاسىندا جىل سايىن جاستارعا ارنالعان 1000-نان استام ەكولوگيالىق، مادەني، سپورتتىق جانە ءبىلىم بەرۋ باعىتىنداعى جوبالار جۇزەگە اسىرىلادى. بۇل باستامالاردىڭ بارلىعى – جاستاردىڭ شىعارماشىلىق الەۋەتىن ارتتىرۋعا، ولاردى قالانىڭ مادەني-قوعامدىق ومىرىنە تارتۋعا جانە بوس ۋاقىتىن قىزىقتى وتكىزۋگە ارنالعان.
«اشىق اسپان استىنداعى كينوكورسەتىلىم» – سول جوبالاردىڭ جارقىن ۇلگىسى. ول تەك كوڭىل كوتەرۋ عانا ەمەس، ۇلتتىق كينونى دارىپتەيتىن، كورەرمەن مەن ونەر اراسىندا رۋحاني كوپىر ورناتاتىن الەۋمەتتىك-مادەني باستاما بولىپ وتىر.