مەملەكەت باسشىسىنىڭ تاپسىرمالارىن جۇزەگە اسىرۋ شەڭبەرىندە ريددەر قالاسىنداعى جىلۋ ەلەكتر ورتالىعىندا جوندەۋ جۇمىستارىن جۇرگىزۋ ءۇشىن ۇكىمەت رەزەرۆىنەن شامامەن 1،7 ملرد تەڭگە ءبولىندى. ءتيىستى قاۋلىعى پرەمەر-مينيستر ولجاس بەكتەنوۆ قول قويدى.
قۇجاتقا سايكەس، ريددەر قالاسىنداعى جىلۋ ەلەكتر ورتالىعىندا جوندەۋ جۇمىستارىن جۇرگىزۋ ءۇشىن شىعىس قازاقستان وبلىسىنىڭ بيۋدجەتىنە اعىمداعى نىسانالى ترانسفەرت تۇرىندەگى قاراجات اۋدارىلادى.
سوڭعى ەكى جىلدا ريددەر جەو-عا ۇكىمەت رەزەرۆى مەن وبلىس بيۋدجەتىنەن 15،5 ملرد تەڭگە باعىتتالدى. قازاندىقتار مەن تۋربينالاردا جوندەۋ-قالپىنا كەلتىرۋ جۇمىستارى جۇرگىزىلدى، ستانسانىڭ توزۋ دەڭگەيى 75%-دان 46%-عا دەيىن تومەندەدى. ۇزىندىعى 21،3 شاقىرىم جىلۋ جەلىسىندە جوندەۋ جۇرگىزىلدى، سونىڭ ناتيجەسىندە جىلۋ جەلىلەرىنىڭ توزۋ دەڭگەيى 82%-دان 67%-عا دەيىن ازايدى.
سونىمەن قاتار 2023-2024 جىلدارداعى جوندەۋ ناۋقانىنا ەنبەگەن توراپتار مەن مەحانيزمدەردى جوندەۋ قاجەت. قازاندىق اگرەگاتتارىن، تۋربواگرەگاتتارىن، سونداي-اق جابدىقتىڭ تۇراقتى تۇردە ەلەكترمەن قامتاماسىز ەتىلۋىنە جاۋاپتى كەشەندى تاراتۋ قۇرىلعىلارىن جوندەۋ قاجەت.
وسىلايشا، بولىنگەن قاراجات ريددەر قالاسىنىڭ جىلۋ ەلەكتر ورتالىعىن الداعى 2025-2026 جىلىتۋ ماۋسىمىنا ۋاقتىلى ءارى ساپالى دايىنداۋدى قامتاماسىز ەتەدى.
ەسكە سالا كەتەيىك، 2024 جىلى جىلۋ ەلەكتر ورتالىعىن ءتيىمدى باسقارۋ، ستانسانىڭ قارجىلىق جانە كادر تۇراقتىلىعىن قامتاماسىز ەتۋ ماقساتىندا مۇلىكتىك كەشەنى كوممۋنالدىق مەنشىككە بەرىلدى.