اشحاباد قالاسىندا ورتالىق ازيا ەلدەرى ءۇشىن ماڭىزدى حالىقارالىق شارا – كليماتتىڭ وزگەرۋىنە ارنالعان VII وڭىرلىك كونفەرەنسيا وتۋدە.
ءىس-شاراعا 200-دەن استام قاتىسۋشى، ونىڭ ىشىندە ورتالىق ازيا مەملەكەتتەرىنىڭ رەسمي دەلەگاسيالارى، حالىقارالىق ۇيىمدار، قارجى ينستيتۋتتارى مەن عىلىمي-زەرتتەۋ ورتالىقتارىنىڭ وكىلدەرى قاتىسىپ جاتىر.
كونفەرەنسيا اياسىندا بىرنەشە وزەكتى ماسەلە تالقىلانۋدا. اتاپ ايتقاندا:
-
جاھاندىق كليماتتىق قارجىلاندىرۋعا قول جەتكىزۋ جولدارى؛
-
كليماتتىق قارجىلاندىرۋ تەتىكتەرىن ازىرلەۋ؛
-
وڭىرلىك كليماتتىق ارحيتەكتۋراعا ۇلتتىق باسىمدىقتاردى ينتەگراسيالاۋ؛
-
تومەن كومىرتەكتى دامۋ جولىنا كوشۋ بويىنشا ىنتىماقتاستىقتى نىعايتۋ.
قازاقستان تاراپىنان ەكولوگيا جانە تابيعي رەسۋرستار ۆيسە-مينيسترى مانسۇر وشۋربايەۆ ءسوز سويلەپ، ەلىمىزدىڭ 2026 جىلى وتەتىن وڭىرلىك كليماتتىق سامميتكە ەرەكشە ءمان بەرىپ وتىرعانىن جەتكىزدى. ونىڭ ايتۋىنشا، الداعى سامميت – وڭىرلىك كليماتتىق ديالوگتى تەرەڭدەتۋگە جانە ورتاق كۇش-جىگەردى ۇيلەستىرۋگە ارنالعان ستراتەگيالىق الاڭ بولماق.
كونفەرەنسيا ناتيجەسىندە ءبىرقاتار وڭىرلىك باستامالار مەن كەلىسىمدەرگە نەگىز قالانادى دەپ كۇتىلۋدە. بۇل – ورتالىق ازيا ەلدەرى اراسىنداعى كليماتتىق ىنتىماقتاستىقتى جاڭا دەڭگەيگە شىعاراتىن ماڭىزدى قادام.