اسحات ايماعامبەتوۆ قازاقستان رەسپۋبليكاسىنىڭ وقۋ-اعارتۋ ءمينيسترى بولىپ تاعايىندالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
«اسحات قانات ۇلى ايماعامبەتوۆ قازاقستان رەسپۋبليكاسىنىڭ وقۋ-اعارتۋ ءمينيسترى بولىپ تاعايىندالسىن، ول قازاقستان رەسپۋبليكاسىنىڭ ءبىلىم جانە عىلىم ءمينيسترى لاۋازىمىنان بوساتىلسىن» دەلىنگەن پرەزيدەنت جارلىعىندا.
اسحات قانات ۇلى 1982 جىلى قاراعاندى وبلىسىندا دۇنيەگە كەلگەن.
2003 جىلى ە. بوكەتوۆ اتىنداعى قارمۋ تاريح فاكۋلتەتىن «تاريحشى، تاريح ءمۇعالىمى» بىلىكتىلىگى بويىنشا ءتامامداعان.
2006 جىلى – قاراعاندى «بولاشاق» اكتۋالدى ءبىلىم بەرۋ ينستيتۋتىنىڭ زاڭ فاكۋلتەتىن «قۇقىقتانۋ» ماماندىعى بويىنشا اياقتاعان.
ەڭبەك جولىن 2002 جىلى ە. بوكەتوۆ اتىنداعى قارمۋ-دەن باستاعان، 2004–2005 جىلدارى «اڭسار» جاستار ليگاسى» قب ءتوراعاسى بولعان، 2005–2006 جىلدارى «مەديا سپ» ج ش س ديرەكتورى، 2006–2012 جىلدارى — قارمۋ ساياساتتانۋ جانە الەۋمەتتانۋ كافەدراسىنىڭ وقىتۋشىسى، اعا وقىتۋشىسى، دوسەنتى رەتىندە قىزمەت اتقارعان.
2012–2014 جىلدارى نۇرا اۋدانى اكىمىنىڭ الەۋمەتتىك ماسەلەلەر جونىندەگى ورىنباسارى قىزمەتىن اتقارعان.
2014 جىلعى اقپان ايىنان باستاپ 2017 جىلعى تامىزعا دەيىن — قاراعاندى وبلىسى ءبىلىم بەرۋ باسقارماسىنىڭ باسشىسى لاۋازىمىن اتقارعان.
2017 جىلعى تامىزدان باستاپ 2019 جىلعى قاڭتارعا دەيىن ق ر ءبىلىم جانە عىلىم ۆيسە-مينيسترى قىزمەتىن اتقارعان.
2019 جىلعى قاڭتاردان ماۋسىمعا دەيىن قاراعاندى وبلىسى اكىمىنىڭ ورىنباسارى بولىپ قىزمەت ەتتى.
2003–2012 جىلدار ارالىعىندا قاراعاندى قالالىق ءماسليحاتىنىڭ III جانە IV شاقىرىلىمدارىنىڭ دەپۋتاتى، قالا ءماسليحاتىنىڭ الەۋمەتتىك ماسەلەلەر بويىنشا تۇراقتى كوميسسياسىنىڭ ءتوراعاسى بولىپ سايلانعان.
2019 جىلعى 13 ماۋسىمىنان قازاقستان رەسپۋبليكاسى ءبىلىم جانە عىلىم ءمينيسترى قىزمەتىن اتقاردى.