اتوم ەلەكتر ستانسياسى الماتى وبلىسى جامبىل اۋدانى ۇلكەن اۋىلى ماڭىندا سالىنادى. بۇل تۋرالى ەنەرگەتيكا ءمينيسترى بولات اقشولاقوۆ ايتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
«قازاقستان بويىنشا سەيسميكالىق ايماقتاردى انىقتاۋ ءۇشىن جىلدار بويى ۇزاق زەرتتەۋ جۇرگىزدىك. ناتيجەسىندە اتوم ستانسياسىنىڭ ورنالاساتىن جەرىن انىقتادىق. ول – الماتى وبلىسىنداعى ۇلكەن اۋىلىنىڭ ايماعى»، - دەدى مينيستر.
بولات اقشولاقوۆتىڭ سوزىنشە، بالقاش كولىنىڭ اۋدانى گەولوگيا، سۋ رەسۋرستارى جانە كليماتتىق جاعدايلاردى ەسكەرە وتىرىپ تاڭدالعان.
«ءقازىر زەرتتەۋ جۇمىستارى باستالىپ كەتتى. بۇل قۇرىلىس ەرتەڭ باستالادى دەگەن ءسوز ەمەس. جىل سوڭىنا دەيىن اەس قۇرىلىسىنا قاتىستى ءبىرقاتار زەرتتەۋلەر جۇرگىزۋ قاجەت. ولار گەولوگيامەن، سۋمەن، ەكولوگيامەن بايلانىستى. ءقازىر ءتۇرلى تەحنولوگيا قاراستىرىلىپ جاتىر. ونىڭ ىشىندە فرانسيالىق، رەسەيلىك، جاپوندىق، قىتايلىق، وڭتۇستىككورەيالىق رەاكتورلار بار»، - دەپ ناقتىلادى مينيستر.
ول ازىرگە جوبا قۇنى بەلگىسىز ەكەنىن اتاپ ءوتتى. ايتۋىنشا، ادەتتە اتوم ەلەكتر ستانسياسىنىڭ قۇرىلىسى ون جىلعا سوزىلادى.