ق ر ءبىلىم جانە عىلىم ءمينيسترى اسحات ايماعامبەتوۆ الەۋمەتتىك جەلىدە ۇلتتىق مەكتەپ سپورت ليگاسىنىڭ اشىلۋ سالتاناتىنا قاتىسقانىن حابارلادى.
ءمينيستردىڭ ايتۋىنشا، بيىل ۇلتتىق ليگا 8 سپورت تۇرىنەن ەمەس، 10 سپورت تۇرىنەن وتەدى. ليگا شەڭبەرىندە ۇيىمداستىرىلاتىن جارىستار الدىمەن مەكتەپتەردە، اۋدان جانە وبلىستا، كەيىن رەسپۋبليكا دەڭگەيىندە وتەدى.
«مۇنداي ءىس-شارالار بالالارىمىزدى سپورتپەن اينالىسۋعا ىنتالاندىرۋ، سونىڭ ىشىندە قازاق حالقىنىڭ اسىق اتۋ جانە توعىزقۇمالاق سىندى ءداستۇرلى سپورت تۇرلەرىنە باۋلۋعا باعىتتالعان. بۇگىن مەكتەپ وقۋشىلارى اسىق ويناپ جاتقانىن كورىپ، ريزا بولدىم. بالالىق شاعىمدا بۇل ويىن ءبىز ءۇشىن فۋتبول سياقتى تانىمال ويىنداردىڭ قاتارىندا بولاتىن»، - دەپ جازدى اسحات ايماعامبەتوۆ .
سونداي-اق، ودان بالالار ۆولەيبول، باسكەتبول، فۋتبول، فۋتزال، ۇستەل تەننيسى، جەڭىل اتلەتيكالىق كروسس جانە باسقا دا سپورت تۇرلەرىن تاڭداي الادى.
«مينيسترلىك مەكتەپ جانە ستۋدەنتتەر سپورت ليگالارىن وتكىزۋ شارالارىن قولدايدى. ءبىز سپورت سەكسيالارىنىڭ جالپى سانىن 50 مىڭعا دەيىن ارتتىرۋدى جوسپارلاپ وتىرمىز. مەملەكەت باسشىسى جولداۋىندا بۇقارالىق سپورتتى دامىتۋعا ەرەكشە نازار اۋداردى. قويىلعان مىندەتتەردى ىسكە اسىرۋ ءۇشىن ق ر بعم كەشەندى جۇمىس جۇرگىزەدى. مينيسترلىك مەكتەپ وقۋشىلارىنىڭ سانىنا بايلانىستى سپورت زالدارىنىڭ سانىن ۇلعايتۋدى كوزدەيتىن ازىرلەنىپ جاتقان مەكتەپتەردىڭ ۇلگىلىك جوبالارىنا ۇسىنىستار ەنگىزدى»، - دەيدى ول.
ءبىلىم ءمينيسترىنىڭ ايتۋىنشا، بالالاردى سەكسيالارمەن قامتۋ ولاردىڭ تالىمگەرلەرىنە دە بايلانىستى. سوندىقتان سپورت سەكسيالارىن جۇرگىزەتىن دەنە شىنىقتىرۋ مۇعالىمدەرىنە جۇمىستارى ءۇشىن اي سايىن قوسىمشا اقشالاي قاراجات تولەنبەك.
«دەنە شىنىقتىرۋ ءپانى مۇعالىمدەرىنەن كوپتەگەن ۇسىنىس كەلىپ تۇسەتىنىن اتاپ وتكىم كەلەدى. ولار ساباقتىڭ تيىمدىلىگىن ارتتىرۋ تۋرالى ءوز ويلارىمەن بولىسەدى. جاقىن ارادا ماسەلەنى تالقىلاۋ جانە ءتيىستى شەشىمدەر قابىلداۋ ءۇشىن كەزدەسۋ وتكىزەتىن بولامىن»، - دەپ ءتۇيدى ءسوزىن ۆەدومستۆو باسشىسى.