ءبىلىم جانە عىلىم ءمينيسترى اسحات ايماعامبەتوۆ مەكتەپتە ورامال تاعۋ ماسەلەسىنە قاتىستى ويىن ايتتى. بۇل تۋرالى ۆەدومستۆو باسشىسى باق-قا بەرگەن سۇحباتىندا كوتەردى، دەپ حابارلايدى Almaty-akshamy.kz Baq.kz-كە سىلتەمە جاساپ.
ايماعامبەتوۆ مەكتەپتەردە ورامال تاعۋ ماسەلەسى تەك ءبىزدىڭ ەلدە عانا ەمەس، باسقا دا ءبىرقاتار ەلدە ۇنەمى قىزۋ تالقىلانىپ كەلە جاتقانىن ايتتى.
"ءبىراق قازاقستان – زايىرلى مەملەكەت جانە مەكتەپ تە زايىرلى مەكەمە. 2016 جىلى قابىلدانعان بۇيرىقتا تالاپتار كورسەتىلگەن. دەگەنمەن ءارتۇرلى توپتاردىڭ ينكليۋزيۆتىلىگىن قامتاماسىز ەتۋ ماڭىزدى ەكەنىن كورىپ وتىرمىز. مىسالى، باسىنا ورامال تاعۋ مۇمكىندىگى بولماعاندىقتان اتا-اناسى ساباققا جىبەرمەيتىن قىزداردىڭ ماسەلەسىن الىپ قاراۋعا بولادى. وسىنداي سەبەپتەرگە بايلانىستى بالالار مەكتەپكە بارماسا نەمەسە قاشىقتان وقۋعا كوشۋگە ءماجبۇر بولسا، وندا ول كەرى اسەرىن تيگىزەدى. جالپى ءبىز ينكليۋزيۆتى قوعام بولۋىمىز كەرەك"، - دەلىنگەن مينيسترلىكتىڭ باسپا ءسوز قىزمەتى تاراتقان حابارلامادا.