سولتۇستىك قازاقستان وبلىسى اققۇدىق ەلدى مەكەنىنىڭ ماڭىندا 36 توننا ديزەل وتىنىن تيەگەن بەنزوۆوز جولدا اۋدارىلىپ قالدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
سقو پوليسيا دەپارتامەنتى باسپا ءسوز قىزمەتىنىڭ مالىمەتىنشە، جول-كولىك وقيعاسى كەشە 5 ماۋسىم كۇنى ساعات 16.20 شاماسىندا تايىنشا اۋدانى اققۇدىق ەلدى مەكەنىنىڭ ماڭىندا بولعان. اۋىلعا بۇرىلىسقا 10 شاقىرىم جەتپەي «VOLVO» جۇك كولىگىنىڭ جۇرگىزۋشىسى رۋلگە يە بولا الماي قالىپ، ماشينانى اۋدارىپ العان. ونىڭ جولدىڭ شەتىندەگى جىراعا ءتۇسىپ كەتۋىنە دوڭگەلەگىنىڭ ىستەن شىعۋى سەبەپ بولۋى مۇمكىن. كولىكتى نۇر-سۇلتان قالاسىنىڭ 30 جاستاعى تۇرعىنى باسقارعان. ول ءۋاليحانوۆ اۋدانى كىشكەنەكولدەن استاناعا 36 توننا ديزەل وتىنىن اپارا جاتقان ەكەن. جول-كولىك اپاتى جايىندا پوليسەيلەرگە كولوننادا كەلە جاتقان باسقا جۇرگىزۋشىلەر حابارلاعان.
وقيعا ورنىنا ءپاترۋلدى پوليسيا باتالونىنىڭ، جەرگىلىكتى پوليسيا قىزمەتىنىڭ، اكىمشىلىك پوليسيا جانە توتەنشە جاعدايلار ءبولىمىنىڭ ماماندارى جەتتى.
«جۇك كولىگىندەگى سۇيىق وتىندى باسقا ماشيناعا قۇيىپ الىپ، VOLVO-نى جۇك تيەگىشپەن كوتەرىپ شىعاردىق. ساعات 23.00 شاماسىندا ءورت سوندىرۋشىلەرمەن بىرگە كولىكتى اققۇدىق اۋىلىنا جەتكىزىپ سالدىق. بەنزوۆوز جۇرگىزۋشىسى 7 ساعات بويى جولدا ءجۇردى»، - دەيدى سقو پد پاترۋلدىك پوليسيا باتالونىنىڭ ينسپەكتورى ساقتيار اشمادياروۆ.