اسەريلەر اراسىندا «مەرگەندەر باتالونى» بايقاۋى ءوتىپ جاتىر

ناتيجەسىندە ۇزدىك باتالون انىقتالادى.

قۇرلىق اسكەرلەردە ۇزدىك باتالون انىقتالىپ جاتىر، دەپ حابارلايدى Almaty-akshamy.kz. 

«قازاقستاننىڭ قارۋلى كۇشتەرىندە 28 اقپان مەن 19 ناۋرىز ارالىعىندا وق اتۋ دايارلىعىنان «مەرگەندەر باتالونى» بايقاۋى ءوتۋ ۇستىندە.ەلىمىزدىڭ بارلىق وڭىرىندەگى پوليگونداردا جارىسقا موتواتقىشتار، تانك، دەسانتتىق-شابۋىلداۋ باتالوندارى، سونداي-اق تەڭىز جاياۋ اسكەرلەرى قاتىسىپ جاتىر»،- دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.

جاۋىنگەرلىك سايىستار مەملەكەت باسشىسى قاسىم-جومارت توقايەۆتىڭ اسكەردىڭ جاۋىنگەرلىك قابىلەتىن تۇبەگەيلى ارتتىرۋ جونىندەگى تاپسىرماسىن ىسكە اسىرۋ اياسىندا وتكىزىلۋدە.

«بولىمشەلەر وق اتۋ داعدىسىنان سايىسقا ءتۇسىپ، شەبەرلىكتەرىن شىڭداۋدا. باتالوندار شتاتتىق قارۋدان جانە جاۋىنگەرلىك ماشينالاردىڭ قارۋ-جاراعىنان كۇندىزگى جانە تۇنگى ۋاقىتتاردا اتىس جاتتىعۋلارىن ورىنداپ جاتىر. بۇل اسكەر جەكە قۇرامىنىڭ دايىندىق دەڭگەيىن، سونداي-اق قۇرامالار مەن بولىمدەردەگى جاۋىنگەرلىك دايارلىقتىڭ تيىمدىلىگىن باعالاۋعا مۇمكىندىك بەرەدى»، – دەدى جاۋىنگەرلىك دايارلىق دەپارتامەنتىنىڭ باستىعى – باس شتاب باستىعىنىڭ ورىنباسارى گەنەرال-مايور داۋلەت وسپانوۆ.

جارىسقا قاتىسۋشىلاردىڭ ءىس-قيمىلىن باس شتاب كوميسسياسى باعالايتىن بولادى. سايىس قورىتىندىسى بويىنشا قۇرلىق اسكەرلەرىنىڭ ۇزدىك باتالونى انىقتالادى.