الماتىلىق دارىگەرلەر ناۋقاسقا ءۇمىت سىيلادى

1973 جىلى تۋعان ناۋقاس الماتى قالالىق جەدەل شۇعىل كومەك كورسەتۋ اۋرۋحاناسىنا (قجشككا) جوسپارلى تۇردە قوس جارمالى يلەوستوما دياگنوزىمەن جاتقىزىلدى. 

وسى جىلى كوكتەمدە قجشككا حيرۋرگيالىق بولىمشەسىندە وعان شۇعىل تۇردە اش ىشەكتىڭ پەرفوراسياسىنا جانە جايىلما ءىرىڭدى فيبريندىك پەريتونيتكە بايلانىستى قوس جارمالى يلەوستوما ورناتۋمەن لاپاروتوميا  وتاسى جاسالعان بولاتىن.

ءۇش ايدان كەيىنگى تەكسەرۋ كەزىندە حيرۋرگ نۇرحات ەسەنبەكوۆ يلەوستومانى جوسپارلى تۇردە جابۋدى ۇسىندى.

1،5 ساعاتقا سوزىلعان وتا ءساتتى ءوتتى. حيرۋرگيالىق ارالاسۋ كەزىندە وڭ جاق مىقىن تۇسى يلەوستوماسىنىڭ ءىشاستاردان تىس رەزەكسياسى جانە «بۇيىردەن ەكىنشى بۇيىرگە» اش ىشەك اناستوموزى، سونىمەن قاتار قۇرساق قۋىسىنا بىلتە قويۋ جۇرگىزىلدى.

وتانى قۇرامىندا تاجىريبەلى ماماندار: جوعارى ساناتتى حيرۋرگ نۇرحات ەسەنبەكوۆ، رەزيدەنت امان بەركىنباي، انەستەزيولوگ مامۋرجان يۋلداشوۆ جانە وتالىق مەدبيكە اسەل نادىروۆا بار توپ جۇزەگە اسىردى.

وتادان كەيىنگى كەزەڭ اسقىنۋسىز ءوتتى، ناۋقاس ازىرگە قجشككا حيرۋرگيا بولىمىندە، جاعدايى تۇراقتى.

يلەوستوما - ءار ءتۇرلى ىشەك جاعدايىنىڭ ناتيجەسىندە قاجەت بولۋى مۇمكىن. ول ىشەكتىڭ ءبىر بولىگىن ءىش قابىرعاسىنداعى ساڭىلاۋعا بەكىتەتىن حيرۋرگيالىق پروسەدۋرا، وسىلايشا قالدىقتار سىرتقا شىعادى. يلەوستومانى جابۋ جوعارى بىلىكتى جانە تاجىريبەلى دارىگەرلەردى قاجەت ەتەدى.

«اش ىشەكتىڭ پەرفوراسياسى ابدومينالدى حيرۋرگيادا وزەكتى ماسەلە بولىپ قالا بەرەدى جانە ستاتيستيكالىق مالىمەتتەرگە سايكەس، ول ءىش قۋىسى مۇشەلەرىنىڭ جەدەل حيرۋرگيالىق پاتولوگياسى اراسىندا 0،37%-2،3% جاعدايدا كەزدەسەدى»، - دەپ اتاپ ءوتتى نۇرحات ەسەنبەكوۆ.