قازاقستاننىڭ شاعىن كولەمدى فلوتىندا 19 مىڭعا جۋىق كەمە بار.
ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى مارات قارابايەۆ ەلىمىزدىڭ سۋ ايدىندارىنداعى قاۋىپسىزدىكتى كۇشەيتۋ بويىنشا قولعا الىنعان جۇمىستار جايلى ايتتى، دەپ حابارلايدى Almaty-akshamy.kz.
Cۋمەن جۇرەتىن كولىكتەردىڭ باسىم بولىگى الاكول جانە بالقاش كولدەرىندە، بۇقتىرما مەن قاپشاعاي سۋ قويمالارىندا، سونداي-اق كاسپيي تەڭىزىنىڭ جاعالاۋىندا قاتىناپ ءجۇر.
ماۋسىم ايىنان باستاپ كولىك باقىلاۋ ينسپەكسيالارى «نازار اۋدارىڭىز! شاعىن فلوت!» رەسپۋبليكالىق ءىس-شاراسىن وتكىزۋدى قولعا العان. بۇل ارقىلى ەلىمىزدە شاعىن كولەمدى كەمەلەردى ءقاۋىپسىز پايدالانۋدى جولعا قويىپ، جاعالاۋلاردىڭ ماڭىنداعى دەمالۋ ورىندارىندا حالىقتىڭ قاۋىپسىزدىگىن ساقتاۋ كوزدەلىپ وتىر. اتالعان ءىس-شارا 31 تامىزعا دەيىن جالعاسادى.
«بىلتىر ەلىمىزدىڭ سۋ ايدىندارىنداعى قاۋىپسىزدىكتى باقىلاۋ ءۇشىن 3061 تەكسەرۋ جۇمىسى جۇرگىزىلىپ، ونىڭ ناتيجەسىندە شاعىن كەمەلەرگە قاتىستى 795 اكىمشىلىك قۇقىقبۇزۋشىلىق انىقتالدى. ولار جەكە قۇتقارۋ قۇرالدارىنىڭ بولماۋى، كەمەنى قۇجاتسىز پايدالانۋ مەن باسقارۋ، ناۆيگاسيالىق بەلگىلەردىڭ تالاپتارىن ساقتاماۋ، سونداي-اق كەمەدەگى قالدىقتار پەن باسقا دا زاتتاردى سۋ ايدىندارىنا توگۋگە قاتىستى بولدى»، - دەدى م.قارابايەۆ.
جەرگىلىكتى اتقارۋشى ورگاندارعا وتىنىشتەردى جىبەرۋدىڭ ناتيجەسىندە ۇستالعان سۋ كولىكتەرىنە ارنالعان ايىپ تۇراقتارى اقمولا، باتىس قازاقستان جانە تۇركىستان وبلىستارىندا قۇرىلدى. الايدا الماتى، شىعىس قازاقستان، قاراعاندى، ماڭعىستاۋ، اباي جانە جەتىسۋ وبلىستارىندا بۇل باعىتتاعى جۇمىس كەنجەلەپ تۇر. مينيستر بۇل وڭىرلەرمەن قاجەتتى جۇمىس جالعاساتىنىن جەتكىزدى.