ارىستانبەك مۇحامەدي ۇلىنىڭ ءىسى قايتا قارالىپ جاتىر

ەلوردا سوتى اپەللياسيالىق شاعىم بويىنشا ۇلتتىق مۋزەيدىڭ بۇرىنعى ديرەكتورى ارىستانبەك مۇحامەديۇلىنا قاتىستى قىلمىستىق ءىستى قايتا قولعا الدى، دەپ حابارلايدى Almaty-akshamy.kz.

«2023 جىلعى 20 ماۋسىمدا سوتتالۋشىلاردىڭ قورعاۋشىلارىنىڭ اتىنان تۇسكەن اپەللياسيالىق شاعىم نەگىزىندە ا. مۇحامەدي ۇلى، ا. نۇرازحان، ا. ءسادۋاقاسوۆا جانە ا. كوشەنوۆكە قاتىستى قىلمىستىق ءىس قايتا قارالادى»، - دەدى سۋديا مۇرات ەركىنبەك ۇلى.

ايتا كەتەيىك، سوت وتىرىسىندا ا. مۇحامەدي ۇلىنىڭ ءۇش سىبايلاسىنىڭ (ا. نۇرازحان، ا. ءسادۋاقاسوۆا جانە ا. كوشەنوۆ) ءىسى بىرگە قايتا قارالىپ جاتىر.

سونداي-اق، سۋديا سوت وتىرىسىنىڭ اشىق فورماتتا، ياعني، قاتىسۋشىلارعا شەكتەۋ قويىلمايتىنىن ايتتى. سوتتالۋشىلاردىڭ ادۆوكاتى مەن قورعاۋشىلارى ءوز وتىنىشتەرىن ءبىلدىرىپ، سوت وتىرىسىن كەيىنگە شەگەرۋدى ۇسىندى.

ەسكە سالايىق، ۇلتتىق مۋزەيدىڭ بۇرىنعى ديرەكتورى ارىستانبەك مۇحامەدي ۇلى 2022 جىلى 28 مامىردا قاماۋعا الىندى.

وعان «التىن ادامنىڭ الەم مۋزەيلەرىنە شەرۋى» حالىقارالىق كورمەسىن وتكىزۋ كەزىندە مەملەكەتتىك ساتىپ الۋ تۋرالى شارت اياسىندا بيۋدجەت قاراجاتىن جىمقىردى دەگەن ايىپ تاعىلدى.

ايتا كەتسەك، سوت بارىسىندا ارىستانبەك مۇحامەدي ۇلى ءوز كىناسىن مويىندامادى.

بيىل 20 ماۋسىمدا سوت ۇكىمىمەن ارىستانبەك مۇحامەدي ۇلى 8 جىلعا باس بوستاندىعىنان ايىرىلدى.

سونىمەن قاتار ەلوردا سوتى ونىڭ سىبايلاستارىنا دا ۇكىم شىعاردى. ۇلتتىق مۋزەيدىڭ بۇرىنعى باسشىسىنىڭ 3 سىبايلاسى دا 7 جىلعا سوتتالدى. 

ەسكە سالايىق، بيىل 26 شىلدەدە ارىستانبەك مۇحامەدي ۇلىنىڭ قورعاۋشىسى سوتقا ءىستى قايتا قاراۋ تۋرالى اپەلياسيالىق شاعىم تۇسىرگەن ەدى.

اتالعان سوت وتىرىسىنىڭ جالعاسى 14 قىركۇيەك كۇنى ساعات 9:30-دا وتەدى.