ارىس قالاسىندا دىنمۇحامەد قونايەۆقا بيۋست ورناتىلدى

قازاقتىڭ ۇلىنىڭ ەسىمى ۇلىقتالدى

ەل تاۋەلسىزدىگىنىڭ 30 جىلدىق مەرەكەسى قارساڭىندا ارىس قالاسىندا كورنەكتى مەملەكەت جانە قوعام قايراتكەرى دىنمۇحاممەد قونايەۆتىڭ ءبيۋستى ورناتىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ايتۋلى شاراعا قالا اكىمى گۇلجان قۇرمانبەكوۆا، زيالى قاۋىم وكىلدەرى جانە قايراتكەردىڭ ءىنىسى ديار قونايەۆ قاتىستى، دەپ حابارلايدى قازاقپارات تۇركىستان وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ. جيىندا قالا اكىمى حالىقتىڭ جۇرەگىنەن ورىن العان ازاماتتىڭ ارىس قالاسىنا سىڭىرگەن ەڭبەگىنە توقتالدى.

«قازاق سسر جوعارعى كەڭەسىنىڭ 1956 جىلعى 31 شىلدەدەگى جارلىعىمەن ارىس قالا مارتەبەسىنە يە بولعانى بەلگىلى. مىنەكەي، تۋرا 65 جىل بۇرىن وسى جارلىقتىڭ كۇشىنە ەنۋىنە دىنمۇحامەد احمەت ۇلى ايرىقشا ىقپال ەتكەنى اقيقات. ءبىز بۇگىن ەل يگىلىگى ءۇشىن ەرەن ەڭبەك ەتكەن ەرلەردىڭ ەسىمىن ۇلىقتاپ، كەيىنگى ۇرپاققا ۇلگى ەتۋ ماقساتىندا وسىنداي سالتاناتتى شارادا باس قوسىپ تۇرمىز. بۇل - ءبىز ءۇشىن زور مارتەبە»، - دەدى گۇلجان مامىت قىزى.

ايتا كەتەيىك، ۇلت ماقتانىشىنىڭ بەينەسى ايشىقتالعان ءمۇسىندى ارىس قالاسىنىڭ تۋماسى، سۋرەتشىلەر وداعىنىڭ مۇشەسى تىلەۋبەردى بيناشيەۆ سىيعا تارتتى.