«ارتسپورت» جوباسىن جۇرتشىلىق جىلى قابىلداعان بولاتىن جانە تەگىن ۇيىرمەلەر مەن سەكسيالارعا بارۋ ارقىلى بالالاردىڭ دامۋىنا ىقپال ەتتى.
الايدا، كەيىننەن سىبايلاس جەمقورلىق ءقاۋپى تونەتىن كوپتەگەن فاكتور انىقتالىپ وتىر. سەناتور رۋسلان رۇستەموۆ ەلىمىز پرەمەر-مينيسترىنىڭ اتىنا جولداعان دەپۋتاتتىق ساۋالىندا وسى پروبلەمالاردى شۇعىل شەشۋدىڭ ماڭىزدىلىعى تۋرالى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سەناتوردىڭ ايتۋىنشا، باعدارلامانى ەنگىزۋ وبلىستىق مادەنيەت جانە سپورت باسقارمالارىنا قوسىمشا اۋقىمدى جۇكتەمە ءتۇسىردى. باسقارما تاراپىنان قاداعالاۋ، تەكسەرۋ جانە اقى تولەۋ جونىندەگى جۇمىستاردىڭ كولەمىن ەسكەرە وتىرىپ، قارجىنىڭ نىسانالى جۇمسالۋىندا كەمشىلىكتەرگە جول بەرۋ ءقاۋپى جوعارى بولىپ وتىر.
«اۋداندار مەن وبلىستىق ماڭىزى بار قالالارعا بولىنەتىن قاراجاتتى ءار اۋماقتاعى بالالاردىڭ سانىنا قاراي پروپورسيونالدى ەسەپتەپ، باعدارلامانى جۇرگىزۋ جانە قارجىلاندىرۋ فۋنكسياسىن اۋداندىق، قالالىق بيۋدجەتتەرگە بەرۋ - كەزەك كۇتتىرمەيتىن ماسەلە»، - دەدى رۋسلان رۇستەموۆ.
سەناتور «ارتسپورت» باعدارلاماسى بويىنشا مەملەكەتتىك ساتىپ الۋدى جۇزەگە اسىرۋ ءۇشىن ءبىرىڭعاي اقپاراتتىق جۇيەنىڭ جوقتىعىنا دا نازار اۋداردى.
دەپۋتاتتىڭ سوزىنە قاراعاندا، وڭىرلەردىڭ ءتۇرلى اقپاراتتىق جۇيەگە كوشۋى كاسىپكەرلەرگە تولەم جاساۋدى كەشىكتىرەدى جانە قارجىنى ماقساتتى جۇمساۋ كەزىندە تاۋەكەلدەر بولادى.
«باعدارلامانى ءتيىمدى ىسكە اسىرۋ ءۇشىن ءبىرىڭعاي اقپاراتتىق جۇيەنى ايقىنداۋ، جالپى، رەسپۋبليكالىق جەلىنى قالىپتاستىرۋ ءۇشىن سالالىق نورماتيۆتىك قۇقىقتىق اكتىلەرگە ماڭىز بەرۋدى مادەنيەت جانە سپورت مينيسترلىگىنە تاپسىرۋدى سۇرايمىز»، - دەدى سەناتور.