ارمەنيانىڭ ۇلتتىق كىتاپحاناسىندا ناۋرىز ايىندا وتەتىن قازاقستان رەسپۋبليكاسى پارلامەنتى ءماجىلىسىنىڭ كەزەكتەن تىس سايلاۋىنا ارنالعان دوڭگەلەك ۇستەل ءوتتى.
ءىس-شاراعا ۇلتتىق كىتاپحانانىڭ باسشىلىعى مەن قىزمەتكەرلەرى، ارمەنيانىڭ ساراپشىلار قوعامداستىعىنىڭ، قوعامدىق ۇيىمدارى مەن ب ا ق وكىلدەرى قاتىستى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
قاتىسۋشىلارعا پرەزيدەنت قاسىم-جومارت توقايەۆتىڭ باستاماشى ەتكەن ساياسي جانە ەكونوميكالىق جاڭعىرتۋدىڭ اۋقىمدى باعدارلاماسى تۋرالى تولىق اقپارات بەرىلدى. كونستيتۋسيالىق رەفورماعا سايكەس جاڭا جانە باسەكەلەستىك جاعدايدا وتەتىن پارلامەنتتىك سايلاۋدى دايىنداۋ جانە وتكىزۋ ماسەلەلەرىنە ەرەكشە نازار اۋدارىلدى. ارميان ساراپشىلارى قازىرگى جاھاندىق سىن-قاتەرلەر جاعدايىندا قازاقستانداعى ەكونوميكالىق جانە ساياسي وزگەرىستەردىڭ ماڭىزدىلىعىن اتاپ ءوتىپ، سايلاۋدىڭ ءساتتى ءوتۋىن تىلەي وتىرىپ، قازاقستان رەسپۋبليكاسى باسشىلىعىنىڭ ساياساتىن جوعارى باعالادى.
ۇلتتىق كىتاپحانا ديرەكتورى اننا چۋليان ەكىجاقتى مادەني-گۋمانيتارلىق جانە عىلىمي-اكادەميالىق بايلانىستاردىڭ ۇدەمەلى دامۋىنا نازار اۋداردى. ول ارمەنيا مەن قازاقستاننىڭ ۇلتتىق كىتاپحانالارى اراسىنداعى ىنتىماقتاستىق باعدارلاماسى اياسىندا استاناعا كەلۋگە نيەت ءبىلدىرىپ، سونداي-اق كىتاپحانا قورى مەن قىزمەتتەرىن سيفرلاندىرۋ اياسىنداعى ارمەنيانىڭ تاجىريبەسىمەن بولىسۋگە دايىن ەكەنىن ايتتى. شارا بارىسىندا ارمەنيا ۇلتتىق كىتاپحاناسىنىڭ قازاق ادەبيەتى ورتالىعىنا قازاق جازۋشىلارىنىڭ كىتاپتارى تابىستالدى.