ArtSport باعدارلاماسى بويىنشا 6 بىردەي قىلمىستىق ءىس قوزعالۋى مۇمكىن.
بۇل تۋرالى الماتى قالاسىنىڭ پروكۋرورلارى ءمالىم ەتتى، دەپ حابارلايدى Almaty-akshamy.kz.
ۆەدومستۆو وكىلدەرىنىڭ ايتۋىنشا، ArtSport باعدارلاماسىنا قاتىستى تەكسەرىس جۇرگىزىلىپ، بىرنەشە ميلليون قاراجات جىمقىرىلعانى انىقتالعان. بيۋدجەت قارجىسىن ۇرلاۋ ءۇشىن ناقتى سحەما قولدانىلعان. سونداي-اق سپورت سەكسيالارىندا بۇرىن سوتتالعان جانە ءارتۇرلى قىلمىس ءۇشىن جاۋاپقا تارتىلعان 10-نان استام جاتتىقتىرۋشى بالالارعا ساباق بەرىپ كەلگەن. ودان بولەك 3 مىڭنان استام بالا شەتەلدە بولسا دا، قاعاز جۇزىندە ۇيىرمەلەرگە تىركەلگەن. 5 مىڭىنا ساباق مۇلدە وتكىزىلمەگەن. كەيبىر جاتتىقتىرۋشىلارمەن ەڭبەك شارتتارى جانە زەينەتاقى اۋدارىمدارى جاسالماعان. سونىمەن قاتار جۇيەنىڭ جۇمىسىندا دا ءبىرشاما ولقىلىقتار بار.
ەسكە سالامىز، بۇعان دەيىن الماتى قالاسىنىڭ اكىمى ەربولات دوسايەۆ 1 قىركۇيەكتەن باستاپ، ArtSport باعدارلاماسىن قارجىلاندىرۋ توقتاتىلاتىنى تۋرالى ايتقان ەدى.