4-8 جەلتوقسان ارالىعىندا Almaty Creative حابتا ArtKöshe تاۋەلسىز تەاترى aLqa لابوراتورياسىنىڭ قورىتىندىسى رەتىندە 5 سپەكتاكلدىڭ پرەمەرا-فەستيۆالىن وتكىزبەك.
aLqa جوباسى ەلىمىز تەاتر ونەرىندەگى قۇندىلىق جانە كوركەمدىك ىزدەنىستەر ماسەلەسىن نىسانعا الا وتىرىپ، تەاتر مەن اكادەميالىق ورتا ەكسپەرتتەرىن توعىستىرىپ، دەموكراتيا قۇندىلىقتارىن جانە تەاتر ەستەتيكاسىنداعى جاڭا كونۆەنسيانى نەگىز ەتكەن ساپالى تۋىندىلار جاسالۋىنا ىقپال ەتۋدى، سونداي-اق، شىعارماشىلىق تاۋەلسىزدىكتى دارىپتەۋدى ماقسات ەتەدى. “ArtKöshe – تاۋەلسىز تەاتر. تاۋەلسىز ۇعىمىن ءار قىرىنان تۇسىندىرۋگە بولادى. ونەر، شىعارماشىلىق پايدا بولعالى ونىڭ بەلگىلى ءبىر زاڭدىلىق-ەرەجەلەرى قالىپتاسىپ، شىعارماشىلىقتى سول زاڭدىلىق-ەرەجەلەر ارقىلى ۇيرەنەمىز، جاسايمىز، قابىلدايمىز، باعالايمىز.
بۇگىندە سول زاڭدىلىق-ەرەجەلەردى تۇسىندىرەتىن، ۇيرەتەتىن نەبىر كىتاپتار، كۋرستار، اكادەميا، ۋنيۆەرسيتەتتەر بار. ءبىر قاراساڭىز بۇل تاماشا، ءبىر قالىپقا تۇسكەن. ءبىراق ونەر، شىعارماشىلىق رەتىندە ادامنىڭ ويى ءبىر قالىپقا سىيمايدى. دۇنيە قالاي شەكسىز پروسەسس بولسا، ول دا سونداي. بۇل تۇرعىدان قاراساق زاڭدىلىق-ەرەجە دەگەنىمىز ونەردىڭ كولونيزاسياسى. بۇگىنگى ونەر تەوريالارىنىڭ نەگىزى قاي تاراپتان تاراعانىن ايتپاعان كۇننىڭ وزىندە. ArtKöshe – تاۋەلسىز، ياعني ءوز بولمىسىن ىزدەگەن دەكولونيال تەاتر. aLqa سول جولعا باسقان قادام”، - دەيدى ArtKöshe تاۋەلسىز تەاترىنىڭ جەتەكشىسى جانە aLqa جوباسىنىڭ اۆتورى، دراماتۋرگ ءانناس باعدات.
جوبا اياسىندا دراماتۋرگيا، رەجيسسۋرا بويىنشا كۋرستار وتكىزىلىپ، كۋرسقا ىرىكتەلگەن 5 دراماتۋرگ پەسا جازىپ، 5 رەجيسسەر سول پەسالاردان سپەكتاكل قويادى.
كۋرسقا قاتىسۋشىلارعا بەلگىلى زەرتتەۋشى-ەكسپەرتتەر عالىم جۇسىپبەك، ءاسيا باعداۋلەت قىزى، شالقار نۇرسەيىت، ورازاي قىدىربايەۆ جانە سەرىك بەيسەمبايەۆ ادام قۇقىقتارى، دەكولونيال، پوستكولونيال، كىمدىك (Identity) ۇعىمدارى، ونەر جانە ساياسات، گەندەر دەكولونيزاسياسى، ونەر جانە ەتيكا، قوعام جانە ونەر قاتارلى تاقىرىپتار بويىنشا ترەنيڭدەر جۇرگىزدى. دراماتۋرگيا كۋرسىن ءا.باعدات، رەجيسسۋرا كۋرسىن بەلگىلى اكتەر، رەجيسسەر، تەاتر پەداگوگى كۋبا ادىلوۆ جۇرگىزدى.
كۋرس ناتيجەسىندە قويىلعان 5 سپەكتاكلدى ارنايى قازىلار باعالايدى. فەستيۆالدىڭ جابىلۋ سالتاناتىندا ۇزدىك سپەكتاكل اۆتورلارىنا باس جۇلدە – بەرليندەگى Theatertreffen 2025 فەستيۆالىنە جولداما تابىستالادى.
aLqa فەستيۆالى اياسىندا وتەتىن پرەمەرالار رەتى تومەندەگىدەي:
04 جەلتوقسان – “404”، دراماتۋرگ ديماش زيادين، رەجيسسەر لاۋرا ماقان؛
05 جەلتوقسان – “Qabyrğa qalqasynda”، دراماتۋرگ اينۇر تولەۋ، رەجيسسەر زاڭعار احمەت-قازى؛
06 جەلتوقسان – “Ünsız”، دراماتۋرگ ايجارىق سۇلتانقوجا، رەجيسسەر ەلدار تاشكەنباي؛
07 جەلتوقسان – “Eskertkış”، دراماتۋرگ ماقسات مالىك، رەجيسسەر نۇرلان باقىتجان ۇلى:
08 جەلتوقسان – “SÖZ”، دراماتۋرگ بەللا قاسىم قىزى، رەجيسسەر سالامات وتەشيەۆ.
4 جەلتوقسان كۇنى ساعات 19:00 aLqa جوباسىنا ارنالعان باسپا ءسوز كونفەرەنسياسى وتەدى. اككرەديتاسيا الۋ ءۇشىن، aLqa جوباسى تۋرالى قوسىمشا سۇراقتار بولسا، +7 778 318 9256 نومىرىنە WhatsApp ارقىلى حابارلاسا الاسىز.
مەكەنجاي: الماتى قالاسى، Almaty Creativee Hub، ماركوۆ كوشەسى، 44، 5-قابات.