Qatar Travel Mart 2024 كورمەسىندە الماتىعا 13 مىڭ شەتەلدىك ءتۋريستى تارتۋ جونىندەگى كەلىسىمگە قول قويىلدى
كاتار استاناسى دوحادا وتكەن Qatar Travel Mart (QTM 2024) حالىقارالىق تۋريستىك كورمەدە الماتىنىڭ ستەندى ۇسىنىلدى. ءۇش كۇندىك كورمەگە 60-قا جۋىق ەل قاتىسىپ، ءىس-شارانى 12 مىڭنان استام ادام تاماشالادى، دەپ حابارلايدى aqshamnews.kz
الماتى ستەندىندە ءوڭىردىڭ تابيعي سۇلۋلىعى مەن مادەني مۇراسى تانىستىرىلدى. قوناقتار ۇلتتىق تاعامداردان ءدام تاتىپ، ءداستۇرلى قازاق كيىمدەرىن كيىپ كورۋگە جانە ت.ب. جاقىننان تانىسۋ مۇمكىندىگىنە يە بولدى. كورمە قورىتىندىسى بويىنشا الماتى «ەڭ ۇزدىك تۋريستىك باعىت» نوميناسياسىندا جەڭىمپاز اتاندى.
الماتىنى Visit Almaty ورتالىعى، 6 قازاقستاندىق تۋروپەراتور جانە «شىمبۇلاق» تاۋ-شاڭعى كۋرورتى تانىستىردى. قازاقستاندىق جانە شەتەلدىك تۋروپەراتورلار اراسىندا 100-دەن استام B2B كەزدەسۋ وتكىزىلىپ، قالاعا 13 مىڭنان استام شەتەلدىك ءتۋريستىڭ كەلۋىن كوزدەيتىن 44 كەلىسىمگە قول قويىلدى. بۇل كەلىسىمدەر ىسكەرلىك بايلانىستاردى نىعايتۋعا جانە الماتىداعى تۋريستىك لەكتى ارتتىرۋعا باعىتتالعان حالىقارالىق ىنتىماقتاستىقتى دامىتۋعا ىقپال ەتەدى.
«ءبىزدىڭ ماقساتىمىز – الماتىنىڭ باي تۋريستىك الەۋەتىن، ونىڭ تابيعي لاندشافتتارىن، مادەني جانە تاريحي ورىندارىن حالىقارالىق سەرىكتەستەرگە، ينۆەستورلارعا جانە تۋريستەرگە تانىستىرۋ. كورمەدە پارسى شىعاناعى ەلدەرىنىڭ تۇرعىندارى ءۇشىن نەگىزگى تۋريستىك باعىت رەتىندە قالانىڭ پوزيسياسىن نىعايتۋعا ەرەكشە نازار اۋدارىلدى، سەبەبى بۇل ايماق قالاعا تۇراقتى جوعارى قىزىعۋشىلىق تانىتىپ وتىر»، – دەدى الماتى قالاسى تۋريزم باسقارماسىنىڭ باس مامانى الماس اقپايەۆ.
«بۇگىنگى تاڭدا دوحا مەن الماتى اراسىندا تىكەلەي اۋە رەيستەرى بار، بۇل قازاقستانمەن تانىسقىسى كەلەتىن تۋريستەر ءۇشىن ساپاردى ايتارلىقتاي جەڭىلدەتەدى. كەزدەسۋلەر ناتيجەسىندە الماتىعا دەگەن قىزىعۋشىلىقتىڭ ارتا تۇسەتىنىنە سەنىمدىمىز»، – دەپ تۋريستىك كومپانيا وكىلى ايشا شاكەنوۆا مۇنداي ءىس-شارالارعا قاتىسۋ حالىقارالىق سەرىكتەستىك ورناتۋعا جانە الماتىنىڭ الەمدىك ارەناداعى ورنىن نىعايتۋعا ىقپال ەتەتىنىن اتاپ ءوتتى.
كورمەگە كەلگەن قوناقتار الماتىنى تۋريستىك باعىت رەتىندە جوعارى باعالادى.
«الماتى – مىندەتتى تۇردە بارعىم كەلەتىن قالا. ول تۋرالى كوپتەگەن جاقسى پىكىر ەستىدىم. شاماسى، بۇل ىسكەرلىك ءتۋريزمدى، دەمالىستى جانە ەكوتۋريزمدى تاماشا ۇيلەستىرەتىن ورىن»، – دەدى كاتار ازاماتى تاريك ال-كۋبايسي.