جوبا شامامەن 150 مىڭ بالانى قامتىماق
Art Sport باعدارلاماسىنا وتىنىمدەر قابىلدايتىن ينتەرنەت-پلاتفورما جۇيەلى جۇمىس جۇرگىزۋگە جارامسىز. وسىنىڭ كەسىرىنەن جان باسىنا شاققانداعى قارجىلاندىرۋ باعدارلاماسىن جۇزەگە اسىرۋ كەزىندە اكىمدىك كۇردەلى پروبلەمالارعا تاپ بولعان. اتىشۋلى جوبا تۋرالى بۇگىن الماتى اكىمىنىڭ ورىنباسارى ارمان قىرىقبايەۆ ارنايى سۇحبات بەرىپ، قارجىلاندىرۋ نەلىكتەن توقتاعانىن ءتۇسىندىردى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قالا اكىمىنىڭ ورىنباسارى ارمان قىرىقبايەۆ ب ا ق وكىلدەرىنىڭ باسىن قوسىپ، ايگىلى Art Sport باعدارلاماسى توڭىرەگىندەگى ماسەلەنى ءتۇسىندىردى. قىركۇيەك بولسا جاقىندادى، ال جوبانى قارجىلاندىرۋدى اكىمدىك قىركۇيەكتە توقتاتاتىنىن حابارلاعان بولاتىن. «اكىم وزگە وڭىرلەرگە قاراعاندا الماتى اقشا ءبولۋ مەرزىمىن بارىنشا ۇزارتىپ، بارلىق مىندەتتەمەنى لايىقتى ورىندادى» دەي كەلە، جۇمىستىڭ توقتاۋىنا Art Sport پلاتفورماسىنداعى ولقىلىقتار سەبەپ بولعانىن اتاپ ءوتتى.
«Art Sport پلاتفورماسى مەملەكەتتىك، رەسمي اقپارات بازالارىنا كىرىكتىرىلمەي، ومىردە جوق ادامداردى قابىلداۋعا جول بەرگەن. ياعني، كەز كەلگەن ادام، كەز كەلگەن ەسىممەن ءوزىن ايقىندايتىن قۇجاتسىز وپ-وڭاي تىركەلە بەرەدى. پلاتفورمادا كەزەككە قويۋ جۇيەسى جوق. سونداي-اق بالاعا جاۋاپتى وكىل ەلەكتروندى ساندىق قولتاڭباسىز اي سايىنعى تابەلدى راستاي بەرەدى. ال تابەلدىڭ شىنايى تولتىرىلعانىن ءبىلىپ، تەكسەرەتىن تەتىك قاراستىرىلماعان»، – دەدى الماتى قالاسى اكىمىنىڭ ورىنباسارى ارمان قىرىقبايەۆ.
پلاتفورما ازاماتتاردىڭ دەربەس دەرەكتەرىن ساقتاۋ ماقساتىندا ءتيىستى سەرتيفيكاتقا يە بولۋى ءتيىس. سونداي-اق دەرەكتەردى وڭدەۋگە كەلىسىم الۋعا مۇمكىندىك بەرەتىن «Smart Bridge» سەرۆيسىنە قوسىلۋى كەرەك ەكەن. Art Sport جۇيەسى بۇل تالاپتاردى دا ساقتاماعان. وسى سياقتى وزگە دە كەمشىن تۇستارى جەتىپ ارتىلاتىن كورىنەدى. باسى مەن اياعى جوق جۇيەنىڭ كەسىرى قالا قازىناسىنا قاتتى زيان كەلتىرىپ، بيىلعا بولىنگەن اقشادان بولەك مادەنيەت باسقارماسى 194 ملن تەڭگە قارىز ەكەنى انىقتالىپتى.
«جاڭا ۆاۋچەر بەرۋدى توقتاتقاننىڭ وزىندە جىلدىڭ باسىنان بەرى 11 ملرد تەڭگەدەي قارجى تولەندى. ەگەر وسىلاي كوزىمىزدى جۇمىپ وتىرا بەرسەك، وندا جىل سوڭىنا دەيىن تاعى 9 ملرد تەڭگە بولۋگە ءماجبۇر بولامىز»، – دەدى الماتى قالاسى اكىمىنىڭ ورىنباسارى ارمان قىرىقبايەۆ.
دەگەنمەن باعدارلاما تۇبەگەيلى توقتاپ قالمايدى. اكىمدىك ءقازىر جوبانى ءوز الدىنا جەكەلەي قاراستىرىپ، قايتادان جاساۋدى قولعا العان. ءبىراق ول تەك مۇقتاج، مۇمكىندىگى شەكتەۋلى بالالارى بار، كوپبالالى وتباسىنا، اتا-اناسىز قالعان بالالارعا ارنالادى. باعدارلاما ءۇشىن ارنايى اقپاراتتىق جۇيە قايتا ىسكە قوسىلادى. وندا ەڭ باستىسى اقپاراتتىق قاۋىپسىزدىك ساقتاۋعا ەرەكشە ءمان بەرىلمەك.
«ەلىمىزدە دەربەس دەرەكتەر تۋرالى زاڭ بار. بالاعا قاتىستى بولسا، ءتىپتى، جاۋاپكەرشىلىك ارتادى. ەرتەڭ جۇيە ارقىلى جەكە دەرەك شىعىپ كەتسە، ەڭ الدىمەن اتا-انالارعا زيانىن تيگىزەدى. سوندىقتان بۇل ىسكە مۇقيات قاراۋىمىز كەرەك»، – دەدى سيفرلاندىرۋ باسقارماسىنىڭ باسشىسى بايان قوڭىربايەۆ.
جوبا شامامەن 150 مىڭ بالانى قامتيدى دەپ كۇتىلىپ وتىر. ونى ەكى ايدا جاساۋ كوزدەلىپتى. جاڭا باعدارلامانىڭ تالاپتارىنا سايكەس كەلەتىن وتباسىلار ەندى جاڭا جۇيەگە قايتادان ءوتىنىم بەرۋلەرى كەرەك. ايتا كەتسەك، Art Sport اياسىندا قالادا بيىل 80 مىڭ بالا تەگىن سەكسيا مەن ۇيىرمەلەرگە قاتىسقان.