«ارسەلورميتتال تەمىرتاۋ»: ەكى كەنشىنىڭ بەتى بەرى قارادى

ءقازىر ەم-دوم الىپ جاتقان كەنشىلەر جۇمىسقا جارامدىلىعى جونىندە مەديسينالىق كوميسسيادان وتەدى

«ارسەلورميتتال تەمىرتاۋعا» قاراستى اباي شاحتاسىنداعى مەتان گازى اتىلعاننان كەيىن جانساقتاۋ بولىمىنە تۇسكەن ەكى كەنشىنىڭ بەتى بەرى قارادى. ءبىر اجالدان امان قالعان ولار جارىلىستىڭ قالاي بولعانىن ايتىپ بەردى، – دەپ حابارلايدى Almaty-akshamy.kz  كتك تەلەارناسىنا سىلتەمە جاساپ.

«جاتقان جەرلەرىمىز ءبىر جارىم، ەكى مەتر بولدى، بارلىعىمىز 8 ادام، ءبىر-بىرىمىزدىڭ ارتىمىزدان جاتتىق. ءبىر-بىرىمىزدىڭ ءتۇرىمىزدى كورمەدىك،  ءارقايسىمىز ءوز جۇمىسىمىزدى ىستەپ جاتقانبىز. تارس ەتە قالدى، سوسىن ءتۇتىن باسىپ كەتتى، ءبىتتى. شامدار ءسوندى، گازدىڭ ءيىسى جوق. ەسىمدە، ءبىرىنشى بولىپ قۇلاعام جوق. ءبىرىنشى اياققا سوسىن ءبىتتى. ارعى جاعىن بىلمەيمىن»، – دەدى كەنشى جەڭىس مارالبايەۆ.

ەلايدىن زەينالوۆ پەن جەڭىس مارالبايەۆتىڭ جانساقتاۋ بولىمىنەن شىققانىنا ەكىنشى كۇن. ەسىن جيىپ العان سوڭ، التى ارىپتەسىنەن ايىرىلعاندارىن ەستىگەندە قاتتى قايعىرعان. ال وزدەرىن قۇداي ساقتاپتى. رەسمي مالىمەتتە بۇل ەكەۋى مارقۇمداردان الشاقتا بولعانى ايتىلعان. سويتسە مۇلدەم ولاي ەمەس ەكەن.

ءقازىر ەم-دوم الىپ جاتقان كەنشىلەر جۇمىسقا جارامدىلىعى جونىندە مەديسينالىق كوميسسيادان وتەدى. جارامدى دەپ تانىلساق، تىرشىلىك قامىمەن شاحتاعا قايتا تۇسۋدەن وزگە امال جوق دەيدى. 7-قاراشادا تاڭعى ساعات 8 جارىمدا اباي اتىنداعى شاحتادا مەتان گازى جارىلعان. جەر استىندا جۇرگەن 64 كەنشىنىڭ 56-سى قاشىپ شىقسا، اپات وشاعىندا بولعان 8 كەنشىنىڭ التاۋى ءولى تابىلدى.