بۇل كورسەتكىش الداعى ۋاقىتتا تاعى ارتۋى مۇمكىن
بۇۇ بوسقىندار ىستەرى جونىندەگى جوعارعى كوميسسارى باسقارماسى الەمدەگى بوسقىندار سانىنىڭ 84 ميلليونعا جەتكەنىن حابارلادى. ولاردىڭ بولجامىنشا، بۇل كورسەتكىش الداعى ۋاقىتتا تاعى دا ءوسۋى مۇمكىن، دەپ حابارلايدى Almaty-akshamy.kz Express Qazaqstan-عا سىلتەمە جاساپ.
بۇۇ سايتىندا جاريالانعان دەرەكتەرگە جۇگىنسەك، 2020 جىلدىڭ اياعىنان 2021 جىلدىڭ ماۋسىمىنا دەيىن دۇنيەجۇزى بويىنشا بوسقىنداردىڭ سانى 82،4 ميلليوننان 84 ميلليونعا دەيىن وسكەن. بوسقىنداردىڭ دەنى كونگو مەن ەفيوپيادان كەلگەن. بۇلاردىڭ قاتارىنا ميانما مەن اۋعانستانداعى ازاماتتاردى قوسۋعا بولادى.
بۇۇ-نىڭ بوسقىندار ءىسى جونىندەگى جوعارعى كوميسسارى فيليپپو گرانديدىڭ ايتۋىنشا، بوسقىندار سانىنىڭ وسۋىنە ەلدەگى تۇراقسىزدىق اسەر ەتكەن.
«حالىقارالىق قوعامداستىق ادامداردى ۇيلەرىن تاستاپ كەتۋگە ءماجبۇر ەتەتىن زورلىق-زومبىلىق، قۋدالاۋ جانە ادام قۇقىقتارىنىڭ بۇزىلۋىنا توسقاۋىل قويا المادى»، – دەيدى فيليپپو گراندي.
جالپى، سوڭعى ءبىر جىلدا بوسقىنداردىڭ باسىم بولىگى بەس ەلدەن كەلگەن. ولار: ورتالىق افريكا رەسپۋبليكاسى – 71،8 مىڭ، وڭتۇستىك سۋدان – 61،7 مىڭ، سيريا – 38،8 مىڭ، اۋعانستان – 25،2 مىڭ جانە نيگەريا – 20،3 مىڭ.