الماتى قالاسى «ەرتە ارالاسۋ الەۋمەتتىك قىزمەتتەر ورتالىعى» بالالار مەن ولاردىڭ قامقور وتباسى ءۇشىن جىلى اتموسفەراعا تولى «ءارقاشان كۇن سونبەسىن!» اتتى ينكليۋزيۆتى مەرەكە ۇيىمداستىردى. ءىس-شارا ورتالىق اۋماعىندا ءوتتى.
بالالار مەيرامىندا ەرەكشە بالالاردىڭ ەمىن-ەركىن ويناپ كۇلۋىنە، دامىتۋ، قولداۋ ءىس-شارالارىنا تۇگەل قاتىسۋىنا ءمان بەرىلدى. ناقتىراق ايتساق، بۇلدىرشىندەرگە ارنالعان ينتەراكتيۆتى ايماق، ءتۇرلى-تۇستى بورمەن اسفالتقا سۋرەت سالۋ، دامىتۋشى ويىندار، انيماتورلاردىڭ ونەر كورسەتۋى مەن مۋزىكالىق نومىرلەر ۇيىمداستىرىلدى.
سونداي-اق، ورتالىق ماماندارى اتا-انالارعا ەرتە جاستاعى دامۋ كىدىرىستەرىن انىقتاۋ مەن تۇزەتۋ تۋرالى كەڭەس بەرەتىن بۇرىش ۇيىمداستىردى.
_”ءار بالا، ءوز ەرەكشەلىگىنە قاراماستان، باقىتتى كۇندەر كەشۋگە جانە تولىققاندى بالالىق شاققا قۇقىلى. ءبىزدىڭ ورتالىقتىڭ ماقساتى — وتباسىلارعا ۋاقىتىلى قولداۋ كورسەتۋ، بولاشاققا دەگەن سەنىمىن ۇستەي ءتۇسۋ”، – دەيدى الماتى قالاسى ەرتە ارالاسۋ ورتالىعىنىڭ ديرەكتورى نۇرزيا الىمبەكوۆا.
ءىس-شاراعا ورتالىقتىڭ سەرىكتەس-دەمەۋشىسى – قازاق گەوگرافيالىق قوعامى مەن «SAM» كومپانياسى ۇلكەن قولداۋ كورسەتتى. بالالارعا ءتۇرلى ويىنشىق، تاتتىلەر كوتەرە كەلگەن قازاق گەوگرافيالىق قوعامىنىڭ قىزمەتكەرى داۋلەت وماروۆ جانە «SAM» كومپانياسىنان ساۋلە قادىربايەۆا مەن الىشەر انارقۇلوۆ ءسوز سويلەپ، بالدىرعاندارعا باقىت، شاتتىق، دەنساۋلىق تىلەدى.
بۇل مەرەكە بالالارعا قۋانىش سىيلاپ قانا قويماي، قوعامنىڭ ەرتە ارالاسۋ مەن ينكليۋزيانىڭ ماڭىزدىلىعىن تۇسىنۋىنە دە ىقپال ەتكەنى ءسوزسىز.
مەرەكە قامقورلىق پەن قۋانىشقا تولى اتموسفەرادا ءوتتى. بالا دا، ونىڭ اتا-اناسى دا ءدان ريزا بولدى.