ولار قازاقستاندىقتاردى جاعدايعا تۇسىنىستىكپەن قاراۋعا شاقىردى.
«وكم وپەراتورى» ءجشس-نىڭ ورنىنا كەلگەن «جاسىل دامۋ» اق اكىمشىلىگى ۋتيل الىمىن قابىلداۋدى ۋاقىتشا توقتاتتى، دەپ حابارلايدى Almaty-akshamy.kz Turkystan.kz سىلتەمە جاساپ.
قازىرگى ۋاقىتتا «وكم وپەراتورى» جاۋاپكەرشىلىگى شەكتەۋلى سەرىكتەستىگىنە قاتىستى قۇزىرلى ورگاندار تەكسەرۋ جۇرگىزىپ جاتقان كورىنەدى.
«وندىرۋشىلەردىڭ كەڭەيتىلگەن مىندەتتەمەلەرىن باسقارۋ فۋنكسياسىن بۇرىنعى وپەراتوردان «جاسىل دامۋ» اق باسشىلىعىنا بەرۋ پروسەسى تولىق اياقتالعان جوق. وسىعان بايلانىستى ۋتيل الىمدارى مەن VETS/VESSSHT قابىلداۋ، ەسكى جابدىقتى كادەگە جاراتۋعا جەتكىزگەنى ءۇشىن وتەماقى تولەۋ، قالدىقتاردى جيناۋشىلاردى، تاسىمالداۋشىلاردى جانە وڭدەۋشىلەردى سۋبسيديالاۋ جانە ەكولوگيالىق كودەكستە كوزدەلگەن باسقا دا قىزمەتتەر ۋاقىتشا توقتاتىلعان»، – دەلىنگەن اكسيونەرلىك قوعامنىڭ باسپا ءسوز قىزمەتىنىڭ حابارلاماسىندا.
اكسيونەرلىك قوعام بارلىق ۇيىمداستىرۋشىلىق-قۇقىقتىق پروسەستەر اياقتالىپ، سەرۆەرلىك باعدارلامالىق قامتاماسىز ەتۋگە تولىق رۇقسات العاننان كەيىن بارلىق مىندەتتەمەلەرىن ورىندايتىنىنا سەندىردى.
«ءبىز جۇرتشىلىقتى بۇل جاعدايعا تۇسىنىستىكپەن قاراۋدى جانە قىزمەتتىڭ قايتا جاندانۋىن كۇتۋدى سۇرايمىز. اقپاراتتىق جۇيەلەر بويىنشا جۇمىستىڭ باستالعانى كەيىنىرەك حابارلانادى»، – دەپ تولىقتىردى كومپانيا وكىلدەرى.