15-25 تامىز ارالىعىندا مولدوۆا رەسپۋبليكاسىنىڭ استاناسى كيشينيەۆتە ارمرەستلينگتەن 45ء-شى الەم چەمپيوناتى ءوتتى، دەپ حابارلايدى aqshamnews.kz.
بيىلعى دوداعا 61 مەملەكەتتەن 1500-گە جۋىق سپورتشى قاتىستى. بۇل قاتاردا جاسوسپىرىمدەر، جاستار، ەرەسەكتەر، ارداگەرلەر جانە پارا اتلەتتەر بار.
بۇل قاتاردا ەلىمىزدىڭ 150 قول كۇرەسىنىڭ شەبەرى بار. ولار 82 التىن، 92 كۇمىس، 82 قولا جۇلدەمەن (بارلىعى 256) جالپى ەسەپتە 1-ورىن الدى. ەكىنشى ورىنعا تۇركيا، ءۇشىنشى ورىنعا گرۋزيا جايعاستى.
وتانداسىمىز نۇرداۋلەت ايدارحان كيشينيەۆتە ەرەسەكتەر اراسىندا 7 دۇركىن (وڭ قولدا التىن، سول قولدا كۇمىس)، جاستار اراسىنداعى ناتيجەسىن قوسقاندا 12 دۇركىن الەم چەمپيونى اتاندى. سونىمەن قاتار مولدوۆادا مەيرامبەك ەرسايىن 7 دۇركىن، ەرداۋلەت نۇرماحان 5 دۇركىن الەم چەمپيونى اتاعىنا قول جەتكىزدى.
ەسكە سالا كەتەيىك، بىلتىر ارمرەستلينگتەن الەم چەمپيوناتى الماتى قالاسىندا وتكەن. 52 ەلدىڭ 1000-نان استام سپورتشىسى باس قوسقان باسەكەدە ۇلتتىق قۇرامانىڭ 256 وكىلى جۇلدەگە تالاسقان. ول كەزدە قازاقستان كومانداسى 72 التىن، 57 كۇمىس، 27 قولا مەدالمەن جالپى ەسەپتە توپ جارعان.
ال 2022 جىلى تۇركيانىڭ انتاليا قالاسىنداعى الەم چەمپيوناتىندا 54 ەلدەن 1700 سپورتشى باس قوسقان. قازاقستان 68 التىن، 66 كۇمىس پەن 36 قولا جۇلدەمەن جالپى ەسەپتە 1-ورىن العان.