قازاقستاننىڭ قارۋلى كۇشتەرى ارميا حالىقارالىق ويىندارىنىڭ «اسكەر مادەنيەتى» اتتى كونكۋرسىنا دايىندالۋدا.
وعان كاسىبي انشىلەر، اسكەري-تاريحي مۇراجايلاردىڭ شىعارماشىلىق ۇجىمدارى مەن قىزمەتكەرلەرى قاتىسادى، دەپ حابارلادى Almaty-akshamy.kz ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ. قاتىسۋشىلار كونكۋرستا ءتورت اتالىم بويىنشا جارىساتىن بولادى. اتاپ وتسەك، ۆوكال، حورەوگرافيالىق شەبەرلىك، اسپاپتىق جانر مەن كورمە قىزمەتى.
– كونكۋرسقا قاتىسۋشىلار پاتريوتتىق اندەردى، مەملەكەتتىك جانە ورىس تىلدەرىندە، الەمدىك كلاسسيكالىق شىعارمالاردى ورىندايدى. شىعارماشىلىق بايقاۋعا قارۋلى كۇشتەرى ۇلتتىق اسكەري-پاتريوتتىق ورتالىعىنىڭ ايگىلى ارتىستەرى دايىندالۋدا. ولاردىڭ بارلىعى – حالىقارالىق بايقاۋلاردىڭ لاۋرەاتتارى، مەملەكەتتىك ماراپاتتاردىڭ يەگەرلەرى، – دەدى ق ر قك ۇلتتىق اسكەري-پاتريوتتىق ورتالىعى ورتالىق ءانسامبلىنىڭ باستىعى، اعا لەيتەنانت قاسىم ايتبايەۆ.
«اسكەر مادەنيەتى» كونكۋرسى 2016 جىلى بەكىتىلىپ، ارميا حالىقارالىق ويىندارىنىڭ ىلەسپە جوباسى بولعان. بيىل شىعارماشىلىق ۇجىمدار جارىسى العاش رەت ارحو-2021 باعدارلاماسىنا ەنگىزىلدى جانە ونىڭ قورىتىندىلارى قاتىسۋشى-مەملەكەتتىڭ جالپى رەيتينگىنە اسەر ەتەتىن بولادى.
جارىس اسكەري قىزمەتشىلەرگە الەم حالىقتارىنىڭ ءتۇرلى ۆوكالدىق جانە حورەوگرافيالىق شىعارماشىلىعىن تانىستىرۋ عانا ەمەس، تالانتتاردى كورسەتۋگە، قازاقستان مادەنيەتىنىڭ ۇلتتىق بەينەسىن كورەرمەندەرگە جەتكىزۋگە مۇمكىندىك بەرەدى.
ەستەرىڭىزگە سالا كەتسەك، ەل قارۋلى كۇشتەرىنىڭ كوماندالارى بيىل ارميا حالىقارالىق ويىندارىندا 11 كونكۋرسقا قاتىساتىن بولادى.