ول جوبالاردا 4 سۋ قويماسى، قۇس فابريكاسى، گيدروەلەكتروستانسيا، ءسۇت فەرماسىن سالۋ قاراستىرىلعان.
جاڭادان تاعايىندالعان اكىمدەر تىڭداۋى تۇستەن كەيىن دە جالعاستى. وبلىس اكىمى اماندىق باتالوۆقا كەربۇلاق، قاراتال، ەسكەلدى اۋداندارىنىڭ اكىمدەرى الداعى جوسپار-جوبالارى تۋرالى باياندادى، - دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
كەربۇلاق اۋدانىنىڭ اكىمى عالياسقار سارىبايەۆتىڭ ايتۋىنشا، اۋدان نەگىزىنەن اۋىل شارۋاشىلىعىمەن اينالىساتىندىقتان، سۋعارمالى جەردىڭ كولەمىن ۇلعايتۋ مىندەتى - ءبىرىنشى كەزەكتەگى ماسەلە. ول ءۇشىن اۋداندا 4 سۋ قويماسىنا كۇردەلى جوندەۋ جۇمىستارى جۇرگىزىلۋدە. 2020 جىلى 541 ملن تەڭگە ءبولىنىپ، "ارالتوبە"، "ۇيەڭكول" سۋ قويمالارىنا كۇردەلى جوندەۋ باستالدى. 2021 جىلى اياقتاۋعا 768 مىڭ تەڭگە ءبولىنىپ، قۇرىلىس جۇمىستارى جالعاسۋدا. قۇرىلىس اياقتالعاندا وڭىردە قوسىمشا 3 مىڭ گەكتار سۋارمالى القاپ اينالىمعا ەنگىزىلەدى.
كەربۇلاق ايماعىندا 27 ينۆەستيسيالىق جوبا تىركەلگەن. ولاردىڭ جالپى قۇنى 613 ملرد 512 ملن تەڭگە. سولاردىڭ قاتارىندا برويلەر ەتىن وندىرەتىن «كاۋسار اگرو» ج ش س قۇس فابريكاسىنىڭ قۇرىلىسى باستالادى. قۇنى 25 ملرد تەڭگەلىك جوبا ىسكە قوسىلعاندا 600 جاڭا جۇمىس ورنى اشىلادى. كوكتال وزەنىنىڭ بويىندا «جارىق ەنەرگو» ج ش س جالپى قۋاتتىلىعى 50 مۆت گيدروەلەكتروستانسياسىنىڭ 1 كاسكادىنىڭ قۇرىلىسىن باستاپ، جوباداعى 5 كاسكاد 2025 جىلعا دەيىن سالىنىپ بىتەدى. «الاسەم» ج ش س سارىوزەك تەمىر جول بەكەتىنە دەيىن 11 شاقىرىم تەمىرجول جەلىسىن سالۋدى جوسپارلاپ وتىر. قۇرىلىسقا 100 ادام تارتىلادى. سول سياقتى تاۋارلى ءسۇت فەرماسى، مال بورداقىلاۋ الاڭدارى سالىنادى دەپ مەجەلەنگەن. اۋدانعا ورتالىق ستاديون، ەمحانا سالۋعا، كوشەنى جارىقتاندىرۋ، ىشكى جولداردى جوندەۋ، اباتتاندىرۋ، 5 ەلدى مەكەندە توزىعى جەتكەن مەدپۋنكتتەردىڭ قۇرىلىسىنا، تالدىبۇلاق، ارالتوبە، قاراشوقى اۋىلدارىنا اۋىز سۋ جۇرگىزۋگە، زيراتتاردى قورشاۋعا جانە باسقا دا ماڭىزدى قاجەتتىلىكتەرگە قارجى سۇرالدى.
وبلىس اكىمى اماندىق باتالوۆ ءوز سوزىندە قارجىنى قاجەت ەتەتىن جوبالاردىڭ ىشىندە ەڭ وزەكتى، كەزەك كۇتتىرمەيتىندەرىنە قارجى بيىلعى ەكىنشى جارتى جىلدىقتا بولىنەتىنىن، ال باسقاسىنا الداعى 2022 جىلدىڭ جوسپارلى بيۋدجەتىنەن قارالاتىنىن ايتتى. ماسەلەن، زيراتتى قورشاۋ جۇمىستارىن «اۋىل – ەل بەسىگى» باعدارلاماسى ارقىلى اتقارۋعا بولادى. ال اتالعان ءۇش اۋىلدىڭ اۋىز سۋعا قاتىستى جوباسى رەسپۋبليكالىق بيۋدجەت ارقىلى قاراستىرىلۋدا. سونىمەن بىرگە عيماراتى توزعان الەۋمەتتىك نىسانداردى جاڭعىرتۋعا نەمەسە قايتا سالۋعا مىندەتتى تۇردە قولداۋ كورسەتىلەتىنى ايتىلدى. سول سياقتى وبلىس اكىمى «سارىوزەك-كوكتال» جولىنىڭ جوندەۋ جۇمىستارىنىڭ جاي-كۇيى تۋرالى سۇراپ، ءىستى تۇراقتى باقىلاۋدا ۇستاۋدى تاپسىردى. ارقارلى پەتروگليفتەرىن قورعاۋ ماسەلەسى دە نازاردان تىس قالماۋى كەرەكتىگى ايتىلدى.
مۇنان كەيىن قاراتال اۋدانىنىڭ اكىمى ەرلان يسابەكوۆ اۋداننىڭ الەۋمەتتىك-ەكونوميكالىق دامۋىنىڭ باسىم باعىتتارى جايلى حابارلادى.
سونىڭ ىشىندە اۋىل شارۋاشىلىعىندا اسىل تۇقىمدى مال باسىن كوبەيتۋ، ەتتى باعىتتاعى مال شارۋاشىلىعىن دامىتۋ، بورداقىلاۋ الاڭدارى، مال ازىعىن دايىنداۋ ءوندىرىسى بار. ەرلان يسابەكوۆتىڭ ايتۋىنشا، قاراتال اۋدانىنىڭ ينۆەستيسيالىق مۇمكىندىكتەرىن پاش ەتەتىن پرەزەنتاسيا دايىنداپ تاراتۋ دا جوسپاردا بار. ياعني اۋداندا تەمىر جولدىڭ بولۋى، ءوڭىردىڭ وبلىس ورتالىعىنا جاقىن ورنالاسۋى، قاراتال وزەنىنىڭ اۋدان اۋماعىنان اعاتىنى، باسقا دا تابيعي-گەوگرافيالىق، ينفراقۇرىلىمدىق مۇمكىندىكتەرى وسى پرەزەنتاسيادا تولىق قامتىلاتىن بولادى.
اۋداننىڭ تاعى ءبىر ۇسىنىسى – ۇشتوبە قالاسىندا شاعىن بيزنەس ءۇشىن بيزنەس-ينكۋباتور قۇرۋ. ياعني جۇمىسپەن قامتۋ ورتالىعىنىڭ بالانسىنداعى جالپى الاڭى 1،5 مىڭ شارشى مەتر بولاتىن 2 قاباتتى عيماراتقا جوندەۋ جۇرگىزىپ، ونىڭ ءبىرىنشى قاباتىن ميكروبيزنەس يەلەرىنە جالعا بەرۋ جوسپارلانعان. تىگىن سەحى، سۇلۋلىق سالونى، شەبەرحانا، وقىتۋ ورتالىعى، ماسساج كابينەتى سياقتى شاعىن بيزنەس اشقىسى كەلەتىندەر وسىندا ورنالاسا الادى. سول سياقتى بۇرىنعى اسكەري-تەحنيكالىق كوللەدجدىڭ قازىرگى كەزدە قولدانىسسىز جاتقان اۋماعىنا ينجەنەرلىك ينفراقۇرىلىم جۇرگىزىپ، ونەركاسىپ سەكتورى ءۇشىن بيزنەس-ينكۋباتور قۇرۋعا بولادى. اۋدان اكىمى ۇشتوبەدە ولكەتانۋ مۋزەيىن اشۋ تۋرالى دا ۇسىنىس ءبىلدىردى. سول سياقتى اۋداندىق ورتالىق اۋرۋحانانى كۇردەلى جوندەۋ جۇمىستارىن اياقتاۋعا دا كومەك سۇرادى.
«اماندىق باتالوۆ بيزنەس-ينكۋباتور قۇرۋ تۋرالى ۇسىنىستى قولدايتىنىن، جوباعا وبلىستىق كاسىپكەرلىك باسقارماسى جان-جاقتى كومەك كورسەتۋى ءتيىس ەكەنىن ايتتى. اۋداندىق اۋرۋحانانىڭ قۇرىلىسىنا قاتىستى ءبىرىنشى ورىنباسارى لاززات تۇرلاشوۆقا ۇشتوبەگە ارنايى بارىپ، ماسەلەنىڭ جاي-جاپسارىن پىسىقتاۋدى تاپسىردى.
قاراتال اۋدانىندا سوناۋ بالقاشقا دەيىنگى ايماقتى دامىتۋدىڭ ءوزى ءبىر بولەك اڭگىمە. كۇرىش ءوسىرۋدىڭ جايى قالاي، ەلدى مەكەندەردە اۋىز سۋ ساپاسىنا بايلانىستى ماسەلە بار ما، ول تۋرالى دا ەشتەڭە ايتىلعان جوق. ءسۇت فەرمالارىن قۇرۋ كەرەك. اۋداندى دامىتۋدى اكىم رەتىندە جان-جاقتى، بارلىق سالانى تۇتاس قامتي وتىرىپ جوسپارلاۋ كەرەك. قاراتال ءوڭىرىن ءالى دە زەرتتەپ، مەڭگەر، جەرگىلىكتى تۇرعىندارمەن، اقساقالدارمەن تىعىز بايلانىستا جۇمىس ىستە»، - دەدى وبلىس اكىمى اماندىق باتالوۆ.
اكىمدەر تىڭداۋى جيىنىن ەسكەلدى اۋدانى قورىتىندىلادى. ەسكەلدى اۋدانىنىڭ اكىمى رۋستام ءالي قارابۇلاق اۋىلىن اباتتاندىرۋ، سونىڭ ىشىندە تۇرعىن ءۇي قۇرىلىسى، كوشە شامدارىن ورناتۋ، اۋىلىشىلىك جولداردى جوندەۋ، بەينەكامەرالار ورناتۋ، كانالداردى تازارتۋ، جاڭالىق جانە الدابەرگەنوۆ اۋىلدارىنا اۋىز سۋ جۇرگىزۋ، اۋدانعا قاجەتتى كوممۋنالدىق تەحنيكا ساتىپ الۋ سياقتى ءبىرقاتار ماسەلەلەر كوتەردى.
«قارابۇلاق زاۋىتىن ىسكە قوسۋعا دايىندىق جۇمىستارى باستالعانىن بىلەسىڭ. سوندىقتان زاۋىتتى قايتا جۇرگىزۋگە قاتىستى ماسەلەلەردى تۇگەل زەردەلەپ، ءبىلىپ ءجۇر. اۋداندى تۇتاس دامىتۋعا كۇش سالۋ كەرەك. قارابۇلاقتا تۇرعىن ءۇي الاڭىن دايىنداپ، ءبىر ءۇي ەمەس، قاتارىنان بىرنەشە كوپ قاباتتى ءۇي سالىپ، شاعىن اۋدان تۇرعىزۋعا بولادى. الدىمەن باس جوسپار جاساپ بەكىتىپ الىپ، سوسىن ەگجەي-تەگجەيلى جوسپارعا ساي قۇرىلىس، اباتتاندىرۋ جۇمىستارىن جۇرگىزە بەرىڭدەر. جالپى باعىتىڭ دۇرىس. مەن جاڭادان تاعايىندالعان اكىمدەرگە جان-جاقتى قولداۋ كورسەتەمىن، سوعان ساي ولاردان جاڭا يدەيالار، جاڭا باستامالار جانە ناتيجەلى جۇمىس كۇتەمىن جانە تالاپ ەتەتىن بولامىن»، - دەدى وبلىس اكىمى اماندىق باتالوۆ.