شاباندوزدار 6 كۇن ىشىندە جالپى 550 شاقىرىم جولدى ءجۇرىپ ءوتتى
12 كوماندا قالدى. 11 قىركۇيەكتە «ۇلى دالا جورىعى» مارافون-بايگەسىنىڭ التىنشى كەزەڭى اياقتالدى. تاڭعى 7:00-دە 14 كوماندا الاشا حان كەسەنەسىنەن جەزقازعان ماڭىنداعى تالاپ اۋىلىنا جولعا شىقتى، دەپ حابارلايدى اlmaty-akshamy.kz.
جورىق باعدارلاماسىنا سايكەس، كوماندالار مارافون-بايگەنىڭ تاعى 100 شاقىرىمىن باعىندىرىپ، التىنشى كەزەڭ مارەسى تالاپ اۋىلىندا قورىتىندىلاندى. وسىلايشا، شاباندوزدار 6 كۇن ىشىندە جالپى 550 شاقىرىم جولدى ءجۇرىپ ءوتتى.
التىنشى كەزەڭ قورىتىندىسى بويىنشا، قوستاناي وبلىسىنىڭ كومانداسى جەڭىمپاز اتاندى. بۇل جولى اقتوبەلىك شاباندوزدار مارە سىزىعىنا ەكىنشى بولىپ كەلسە، ماڭعىستاۋ وبلىسىنىڭ «كوكمويناق» كومانداسى ءۇشىنشى بولىپ جەتتى. وكىنىشكە قاراي، اتالمىش كەزەڭدە اتتارىنىڭ جاراقات الۋىنا بايلانىستى قىزىلوردا، اقمولا كوماندالارى جارىستى توقتاتتى.
التى كۇننىڭ قورىتىندىسى بويىنشا كوماندالاردىڭ جالپى ۋاقىتى:
1 ورىن - ماڭعىستاۋ وبلىسى، 35 ساعات 49 مينۋت 16 سەكۋند
2 ورىن - اقتوبە وبلىسى، 37 ساعات 26 مينۋت 40 سەكۋند
3 ورىن - قوستاناي وبلىسى، 38 ساعات 20 مينۋت 20 سەكۋند
4 ورىن - جەتىسۋ وبلىسى، 38 ساعات 45 مينۋت 25 سەكۋند
5 ورىن - جامبىل وبلىسى، 39 ساعات 10 مينۋت 08 سەكۋند
6 ورىن - استانا قالاسى، 40 ساعات 03 مينۋت 58 سەكۋند
7 ورىن - اباي وبلىسى، 40 ساعات 56 مينۋت 03 سەكۋند
8 ورىن - الماتى قالاسى، 41 ساعات 41 مينۋت 03 سەكۋند
9 ورىن - تۇركىستان وبلىسى، 44 ساعات 44 مينۋت 25 سەكۋند
10 ورىن - الماتى وبلىسى، 47 ساعات 14 مينۋت 18 سەكۋند
11 ورىن - قاراعاندى وبلىسى، 48 ساعات 19 مينۋت 00 سەكۋند
12 ورىن - ۇلىتاۋ وبلىسى، 60 ساعات 46 مينۋت 36 سەكۋند
تالاپ اۋىلىندا تۇنەگەن 12 كوماندا ەرتەڭ، ياعني 12 قىركۇيەكتە تاڭعى ساعات 7:00-دەن باستاپ العاشقى 50 شاقىرىمدى ەڭسەرۋ ءۇشىن جەزقازعان-قىزىلوردا تاس جولىنا باعىت الادى. تۇسكى استان سوڭ 7-كەزەڭنىڭ كەزەكتى 50 شاقىرىمىن باعىندىرۋى ءتيىس. سونىمەن كوماندالار الدىندا 650ء-ىنشى شاقىرىمدى ەڭسەرۋ مىندەتى تۇر.
وكىنىشكە قاراي، كوماندا قۇرامىندا 4 قىز قالعان اقمولا وبلىسىنىڭ «ءيمانجۇسىپ» كومانداسى العاشقى 50 شاقىرىمدى وتكەننەن كەيىن ەكى اتىنىڭ جاراقات الۋىنا بايلانىستى جارىستى توقتاتۋعا ءماجبۇر بولدى. دەگەنمەن «شاباندوز ارۋ» اتانعان ءلاززات احمەتوۆا بۇل جەڭىلىس ەمەس، كەرىسىنشە العاش رەت بۇرىمدىلاردىڭ بورىكتىلەرمەن بىرگە يىق تىرەسە جورىققا قاتىسۋى ۇلكەن جەڭىس ەكەنىن اتاپ ءوتتى.
«جوبا ماعان قاتتى ۇنادى. ءبىز ءۇشىن ەڭ ماڭىزدىسى – اتتاردىڭ اماندىعى. سايىس بولعان سوڭ جاراقاتتىڭ بولماۋى مۇمكىن ەمەس. وكىنىشكە قاراي، جىلقىلارىمىز اياقاستى جاراقات الدى. ەڭ سوڭعى ەلۋ شاقىرىم ءبىز ءۇشىن وتە كۇردەلى بولسا دا، جول بويىندا تاريحي، مادەني نىساندارعا كۋا بولدىق. الاش حان، جوشى حان كەسەنەلەرىن كەزدەستىردىك. مەن مۇنداي مارافون-بايگەگە العاش رەت قاتىسىپ وتىرمىن. ۇيىمداستىرۋشىلارعا العىسىم شەكسىز»، - دەدى ل. احمەتوۆا.
ەسكە سالا كەتەيىك، بۇعان دەيىن بقو، سقو، شقو، پاۆلودار وبلىستارى مەن شىمكەنت قالاسىنىڭ كومانداسى جارىستان شىعىپ قالعانىن حابارلاعان ەدىك.
ايتا كەتەيىك، «ۇلى دالا جورىعى» رەسپۋبليكالىق مارافون-بايگەسىنىڭ باس سەرىكتەسى – «Sport Qory» تۋريزم يندۋسترياسى مەن سپورتتى قولداۋ قورى.