20 قىركۇيەكتەن باستاپ الماتىدا كۇزگى اعاش وتىرعىزۋ باستالادى. قالادا 298 مىڭ كوشەت ەگىلەدى، دەپ حابارلايدى Almaty-akshamy.kz
كۇزگى وتىرعىزۋ قالانىڭ بارلىق اۋدانىن قامتيدى. اتاپ ايتساق، مەدەۋ اۋدانىندا 22 مىڭ، جەتىسۋ اۋدانىندا 16 مىڭ، تۇركسىب اۋدانىندا 28 مىڭ، ناۋرىزباي اۋدانىندا 10 مىڭ، المالى، اۋەزوۆ جانە بوستاندىق اۋداندارىندا 5 مىڭ، الاتاۋ اۋدانىندا 207 مىڭ اعاش.
عالىمداردىڭ ۇسىنىسى بويىنشا بيىل الماتىنىڭ قالالىق كوگالداندىرۋشىلارى تەك اتالىق تەرەك وتىرعىزادى.
بوتانيكا جانە فيتوينترودۋكسيا ينستيتۋتىنىڭ باس ديرەكتورى گۇلنار سيتپايەۆا ايتۋىنشا، تەرەكتەر اتالىعى دا، انالىعى دا بار ەكىۇيلى وسىمدىك.
«انالىعى پىسىپ-جەتىلگەن سوڭ كوپ مولشەردە مامىق شىعارادى، بۇل كوپتەگەن ادامدا اللەرگيالىق رەاكسيا تۋدىرادى. اتالىقتارى مۇنداي رەاكسيا بەرمەيدى»، - دەيدى عالىم.
2017 جىلى عىلىمي قىزمەتكەرلەر الماتى قالاسىن كوگالداندىرۋ بويىنشا ۇسىنىمدار جيناعىن شىعاردى، وعان جەرگىلىكتى كليمات پەن قالالىق جاعدايعا بارىنشا قولايلى اعاش وسىمدىكتەرىنىڭ 200-گە جۋىق ءتۇرى ەنگىزىلگەن.
«ولاردىڭ ىشىندە كۇزگى وتىرعىزۋ كەزىندە شەگىرشىن، ۇيەڭكى، شاعان، قايىڭ، ەمەن، جوكە، تەرەك جانە باسقا دا جالپاق جاپىراقتى تۇرلەرى قولدانىلادى. ساندىك اعاشتاردان قابىرجاق، قىنا اعاش سياقتى ماڭگى جاسىل تۇرلەرى وتىرعىزىلادى»، - دەدى ول.
وتىرعىزۋ ءۇشىن تاڭدالعان بارلىق وسىمدىك كوپجىلدىق سىناقتان ءوتتى، قالاداعى ايازعا، قۇرعاقشىلىققا جانە زياندى شىعارىندىلارعا توزىمدىلىگىن كورسەتتى.
الماتى قالاسىنىڭ جاسىل جەلەكتەرىن كۇتىپ-باپتاۋ مەن قورعاۋدىڭ جاڭا ەرەجەسىنە سايكەس، كوشەتتەردى تاڭداۋدا تالاپتار كۇشەيتىلدى – بەلگىلى ءبىر مولشەردە (بيىكتىگى كەمىندە 2-2،5 م)، جاقسى وسكەن تامىر جابىق ءارى شىمىمەن بولۋى كەرەك. بۇل شارالار اعاشتاردىڭ تامىرلانىپ ءوسۋ مۇمكىندىگىن ارتتىرىپ، قۋراپ كەتۋىن ازايتادى.