«Almaty aqshamy» گازەتىنىڭ 35 جىلدىق مەرەكەسىنە وراي، باسىلىمدا ءار جىلدارى ەڭبەك ەتكەن ارداگەرلەر رەداكسيامىزدا باس قوستى.
ءبىزدىڭ قازاق «كوپ جاساعاننان ەمەس، كوپتى كورگەننەن سۇرا» دەگەن عوي. سول ايتپاقشى، قاي كەزدە دە اعا بۋىنعا ارقا سۇيەيتىنىمىز راس. ءومىردىڭ اششى-تۇششىسىن تاتىپ، باسپاسوزدە كوپ جىل ەسەلى ەڭبەك ەتكەن، «اقشامدا» ماڭداي تەرى ءسىڭىپ، قولتاڭباسى قالعان ارداگەرلەرگە دەگەن قۇرمەتىمىز ەرەكشە. وتكەنسىز كەمەل كەلەشەك بولمايتىنى سىندى، اقىلدى قارياسىز-اعىندى دارياسىز، يگىلىگى مول يدەياسىز جاسامپاز گازەت شىعارۋ مۇمكىن ەمەس.
«وزدەرىڭىزدىڭ باي تاجىريبەلەرىڭىز كەيىنگى ورتا بۋىن مەن جاس بۋىنعا اسا قاجەت. وسى ماقساتتى العا تۇتىپ، مەرەيلى داتا الدىندا داستارحاننان ءدام تاتقىزىپ، وزدەرىڭىزدىڭ اقىل-كەڭەستەرىڭىزگە قۇلاق تۇرگىمىز كەلدى»، – دەدى «اقشام» رەداكسياسىندا ارداگەرلەردى اقجارىلا قارسى العان «Alatau اqparat» جشس-نىڭ باس ديرەكتورى ەرجان قالىمباي ۇلى.
«اقشامعا» اق باتاسىن ارناعان قازاقستاننىڭ قۇرمەتتى ءجۋرناليسى سارسەنبەك بەكمۇرات ۇلى باستاعان قانات قايىم، وتەش قىرعىزباي، ەرمەك جۇماحمەت ۇلى، زەينوللا اباجانوۆ، جەكسەن الپارتەگى، نۇرجامال بايساقال، قارلىعاش بەسىروۆا وزدەرىنىڭ سۇيىكتى گازەتىنە ىستىق ىقىلاسىن ءبىلدىرىپ، تىلەگىن ارناپ، ۇسىنىسىن جەتكىزدى. قارلىعاش زامانداسىمىزدىڭ جارى، باسىلىم ەڭبەكتورىسى، جەلتوقسان قاھارمانى قۇتتىبەك ايماحان (مارقۇم) ەكەۋىنىڭ تانىسىپ، بىلىسۋىنە «اقشام»، وتاۋ قۇرۋىنا اقشامدىقتار سەپ بولعانىن ايتتى.
گازەت تە جاندى دۇنيە. ونىڭ دا ءوسۋ، كەمەلدەنۋ كەزەڭى بولادى. بۇگىنگى اقپارات قۇرالدارىنا جاڭاشا شەشىم، جاڭاشا قادام جاسالۋى قاجەتتىگى تاعى بار. الەمدە ءجۇرىپ جاتقان اقپاراتتىق-پسيحولوگيالىق مايدان سونى كورسەتۋدە.
«اقپاراتتىق ستراتەگيامىزدى نىعايتپاق ويدامىز. باسىلىمنىڭ سىرتقى كەلبەتىن وزگەرتىپ قانا قويماي، ىشكى مازمۇنىنا ءمان بەرمەكپىز. بۇگىنگى زامان ساپالى اقپارات ءداۋىرى عوي»، – دەگەن ج ش س باس ديرەكتورى قۇرمەتتى قوناقتارعا گازەتتىڭ الداعى باعىت-باعدارى جايىندا ءمالىم ەتتى.
ەمەن-جارقىن جۇزدەسۋدەن سوڭ ارداگەرلەر رەداكسيا عيماراتىنىڭ الدىندا ەستەلىك سۋرەتكە ءتۇستى. ءوز كەزەگىندە ءبىز دە الدى سەكسەننىڭ سەڭگىرىنە شىققان قالامگەرلەرمەن «تەك جاقسىلىقتا جولىعايىق، جاقسى كۇندەردە كەزدەسكەنشە» دەپ قوش ايتىستىق.