الەۋمەتتىك جەلى بەلسەندىسى اكىم بولدى

بەلسەندى ازامات قوعامداعى ءتۇرلى كەمشىلىكتەردى كوتەرىپ، ولاردىڭ شەشىلۋىنە ۇلەس قوسىپ كەلەدى

الەۋمەتتىك جەلى بەلسەندىسى اسقار ايداربەكوۆ تۇلكىباس اۋدانىنداعى ساستوبە اۋىلىنىڭ اكىمى بولىپ سايلاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.

جەكسەنبى كۇنى وتكەن سايلاۋدا داۋىس بەرۋشىلەرگە ەكى كانديدات ۇسىنىلدى. ءبىرى – وسى اۋىلدىڭ بۇعان دەيىنگى اكىمى سۇلتان پايزالييەۆ، ەكىنشىسى – اسقار ايداربەكوۆ. سايلاۋشىلاردىڭ باسىم بولىگى اسقار ايداربەكوۆتى قولداپ داۋىس بەرگەن. ال، بۇگىن اۋداندىق سايلاۋ كوميسسياسىنىڭ ءتوراعاسى ە. قاراتايەۆ پەن اۋدان اكىمىنىڭ ورىنباسارى ە. ورمانوۆ جاڭا اكىمگە كۋالىگىن تابىس ەتتى.

«داۋىس بەرۋ ءۇش ۋچاسكەدە ءوتتى. ونىڭ بىرەۋىندە قارسىلاسىم باسىم ءتۇستى. ال، قالعان ەكەۋىندە مەن جەڭىسكە جەتتىم. ەندى الدا ۇلكەن جۇمىستار كۇتىپ تۇر. سايلاۋالدى باعدارلاماما سايكەس اۋىلدى گۇلدەندىرۋ ماقساتىندا جۇمىس ىستەيمىن. سايلاۋشىلاردىڭ ماعان ارتقان سەنىمىن اقتاۋ ءۇشىن ايانباي تەر توگىپ، ەلىمىزدىڭ وسىپ-وركەندەۋ جولىندا بار كۇش-جىگەرىمدى جۇمسايمىن!» - دەيدى ول.

سايلاۋالدى باعدارلاماسىنا سايكەس، اۋىل اكىمى جاڭا مەكتەپ پەن اۋرۋحانا سالۋ، قيراپ تۇرعان تۇرعىن ۇيلەردى بۇزۋ، كوشەلەر مەن جولداردى كۇتىپ ۇستاۋ، ەلدى مەكەندەردى اباتتاندىرۋ، سانيتارلىق تازالىقتى قامتاماسىز ەتۋ سەكىلدى جۇمىستاردى اتقارۋدى جوسپارلاپ وتىر.

ايتا كەتسەك، اسقار ايداربەكوۆتىڭ ەسىمى كوپشىلىككە الەۋمەتتىك جەلى ارقىلى جاقسى تانىس. بەلسەندى ازامات قوعامداعى ءتۇرلى كەمشىلىكتەردى كوتەرىپ، ولاردىڭ شەشىلۋىنە ۇلەس قوسىپ كەلەدى. 2016-2021 جىلدار ارالىعىندا تۇلكىباس اۋداندىق ءماسليحاتى Vءى شاقىرىلىمىنىڭ دەپۋتاتى بولدى. جەكە كومپانيالاردا زاڭگەر قىزمەتىن اتقاردى. ش. مۇرتازا اتىنداعى قايىرىمدىلىق قوردىڭ مەنەدجەرى بولىپ ەڭبەك ەتتى.