WhatsApp-تا قازاقستاندىقتارعا تولەنەتىن تولەمدەر تۋرالى فەيك اقپارات تاراتىلۋدا، دەپ حابارلايدى Almaty-akshamy.kz.
Stopfake.kzء-تىڭ حابارلاۋىنشا، ءدال وسىنداي اقپارات 2022 جىلدىڭ جەلتوقسانىندا بولعان. ءبىراق وندا پارلامەنت سايلاۋى ەمەس، 2022 جىلعى 20 قاراشادا وتكەن كەزەكتەن تىس پرەزيدەنت سايلاۋى تۋرالى جازىلدى. سايلانعاننان كەيىن قاسىم-جومارت توقايەۆ «193817 لۆ» مولشەرىندەگى تولەمدەر جاسايتىنى تۋرالى جاريا ەتىلدى.
شىن مانىندە، قازاقستاننىڭ ءاربىر ازاماتىنا تولەم جاساۋ باعدارلاماسى تۋرالى سول كەزدە دە، ءقازىر دە ايتىلىپ جاتقان جوق.
سونىمەن قاتار، تاراتىلىمدا سوما «لۆ» بەلگىسىمەن كورسەتىلگەن. بۇل قازاقستاندىق تەڭگەنىڭ ەمەس، ليەۆ – بولگار ۆاليۋتاسىنىڭ بەلگىسى.
تولەمدى رەسمي ينتەرنەت-رەسۋرستان ەمەس، worldcup-a2.buzz سايتىنان الۋ كەرەك. باستى بەتتىڭ ورتاسىندا ورنالاسقان تۇيمەنى باسۋ ارقىلى تولەمدى الۋعا بولادى ەكەن.
الايدا، ونى باسقاننان كەيىن پايدالانۋشى ارنايى جولعا «ۇيالى تەلەفون» ءنومىرىن ەنگىزۋى كەرەك.
وسىلاي رەسىمدەلگەن جانە مازمۇنى بار سايتتار مەملەكەتتىك ورگاندارعا تيەسىلى ەمەستىگى جانە ناقتى مەملەكەتتىك باعدارلامالارعا جاناما بولسىن قاتىسى جوق ەكەنى انىق.
قورىتا ايتقاندا، بۇل اقپارات – پايدالانۋشىلاردىڭ جەكە دەرەكتەرىن وسىلاي جينايتىن الاياقتاردىڭ ءىسى. جەلىدە مۇنداي ايلا-امالدارعا تاپ بولماۋدىڭ جولدارى تۋرالى ءبىز بۇعان دەيىن ايتىلىپ، جازىلىپ ءجۇر.
