ەربولات دوسايەۆ دەنە شىنىقتىرۋ-ساۋىقتىرۋ كەشەندەرىن جوبالاۋ نورماتيۆتەرىن قايتا قاراۋدى تاپسىردى
الماتى اكىمى ەربولات دوسايەۆ جۇمىس ساپارى بارىسىندا الاتاۋ اۋدانىنىڭ زەردەلى ش/ا اۋماعى 3 مىڭ شارشى مەتردەن اساتىن جاڭا دەنە شىنىقتىرۋ-ساۋىقتىرۋ كەشەنىنىڭ قۇرىلىسىن تەكسەردى. قالا باسشىسىنا سپورت زال، سەكسيالىق ساباقتارعا ارنالعان نىساندار كورسەتىلدى، دەپ حابارلايدى almaty-akshamy.kz
ەربولات دوسايەۆ سپورت باسقارماسىنىڭ باسشىسىنا جوبادا باسسەيننىڭ جوقتىعىن كورسەتىپ، قۇرىلىسى جوسپارلانعان بارلىق دەنە شىنىقتىرۋ-ساۋىقتىرۋ كەشەنىندە باسسەينگە ورىن قاراستىرۋدى تاپسىردى.
جاڭا دەنە شىنىقتىرۋ-ساۋىقتىرۋ كەشەنىن كورگەن الماتى اكىمى نىساندى مۇنداي جاعدايدا قابىلداۋعا تىيىم سالدى. قالا اكىمى قۇرىلىس باسقارماسى باسشىسىنا نىساندى ءتيىمسىز پايدالانباۋعا، عيماراتتىڭ ورتالىقتا بولۋىنا جانە كەلۋشىلەردىڭ ساباققا قاتىسۋىنا ىڭعايلى ەتىپ قايتا قاراۋ كەرەكتىگىن ايتتى. سونىمەن قاتار، ەربولات دوسايەۆ مۇمكىندىگى شەكتەۋلى جاندار ءۇشىن قولايلى جاعداي جاساۋدى جۇكتەدى.
دەنە شىنىقتىرۋ-ساۋىقتىرۋ كەشەنى قۇرىلىسىن «كاپسترويگرۋپپ-ت» ج ش س مەردىگەرلىك ۇيىمى 2021 جىلدىڭ تامىزىندا باستاعان. الايدا قۇرىلىس ماتەريالدارىنىڭ قىمباتتاۋىنا بايلانىستى جۇمىس 2021 جىلدىڭ سوڭىندا توقتاتىلىپ، 2022 جىلدىڭ جازىندا جوباعا تۇزەتۋ ەنگىزىلگەن سوڭ قايتا جانداندى. بۇگىندە كەشەندى سالۋ بويىنشا قۇرىلىس-مونتاج جۇمىستارى اياقتالدى. ءقازىر عيمارات ينجەنەرلىك جەلىلەرگە قوسىلعان، اۋماقتى اباتتاندىرۋ جۇمىستارى جالعاسىپ جاتىر.
زەردەلى ش/ا جاڭا دەنە شىنىقتىرۋ-ساۋىقتىرۋ كەشەنى الاتاۋ اۋدانىندا العاش رەت سالىنىپ وتىر. وعان كۇنىنە 400-گە دەيىن بالا بارا الادى. دەنە شىنىقتىرۋ-ساۋىقتىرۋ كەشەنى اۋداننىڭ سپورت سەكسياسىنا دەگەن قاجەتتىلىكتەرىن ەسكەرە وتىرىپ جوبالانعان: زەردەلىدە بالالار باسكەتبول، ۆولەيبول، دزيۋدو، تاەكۆوندو، بوكس جانە پاۋەرليفتينگكە قاتىسا الادى.
الاتاۋ اۋدانىنىڭ اكىمى ازامات قالدىبەكوۆ قالا باسشىسىنا تۇرعىنداردىڭ ءومىر ءسۇرۋ ساپاسىن جاقسارتۋ بويىنشا قابىلدانىپ جاتقان شارالار تۋرالى بايانداپ، دەنساۋلىق ساقتاۋ جانە ءبىلىم بەرۋ نىساندارىن سالۋ جوباسىن ۇسىندى. ەربولات دوسايەۆ زەردەلى ش/ا ساياباق قۇرىلىسى اياسىندا كوگالداندىرۋ ماسەلەسىنە ەرەكشە نازار اۋدارۋدى جانە جاسىل جەلەكتەردىڭ سانىن كوبەيتۋدى تاپسىردى.
انىقتاما:
الماتىدا بالالار مەن جاستاردى قولجەتىمدى سپورت سەكسيالارىمەن قامتاماسىز ەتۋ، حالىقتى سالاۋاتتى ءومىر سالتىنا تارتۋ ءۇشىن مەدەۋ اۋدانىنىڭ الاتاۋ شاعىن اۋدانىندا جانە تۇركسىب اۋدانىنىڭ جاس قانات شاعىن اۋدانىندا دەنە شىنىقتىرۋ-ساۋىقتىرۋ كەشەنى پايدا بولادى. ولاردىڭ قۇرىلىسى كەستەگە سايكەس، 2023 جىلدىڭ سوڭىنا دەيىن اياقتالادى.