قالا اينابۇلاق - 4 شاعىن اۋدانىنداعى بالاباقشا قۇرىلىسىنىڭ جوباسىن بەلگىلەنگەن ستاندارتتار مەن تالاپتارعا ساي جۇرگىزبەگەن ءارى ساپاسىز سالعان «اك Construction» ج ش س مەردىگەر - كومپانياسىن سوتقا بەرەتىن بولدى. بۇل تۋرالى جەتىسۋ اۋدانىن جۇمىس ساپارى بارىسىندا ارالاعان ەربولات دوسايەۆ مالىمدەدى، دەپ حابارلايدى almaty-akshamy.kz
جەتىسۋ اۋدانىنىڭ اينابۇلاق - 4 شاعىن اۋدانىنداعى 160 ورىندىق جاڭا مەملەكەتتىك بالاباقشا 1987 جىلى سالىنعان، كەيىن سۇرىلگەن ءارى 10 جىل بوس تۇرعان نىساننىڭ ورنىنا سالىنۋدا. قۇرىلىس قالا باسشىسىنىڭ تاپسىرماسى بويىنشا 2022 جىلدىڭ مامىر ايىندا باستالدى.
قالا باسشىسى بالاباقشانى ارالاعان كەزدە قۇرىلىس باسقارماسى باسشىلىعىنىڭ نازارىن قۇرىلىس-مونتاج جانە ارلەۋ جۇمىستارىن جۇرگىزۋدەگى كەمشىلىكتەرگە اۋداردى: قابىرعالار ساپاسىز سىرلانعان، كوشەدەگى ويىن الاڭى بۇلدىرشىندەرگە بەيىمدەلمەگەن جانە ت.ب. ەربولات دوسايەۆ ولقىلىقتارى وتە كوپ وبەكتىنى قابىلداۋعا بولمايتىنىن اتاپ ءوتتى. باستى نازاردا ساپا بولۋى ءتيىس ەكەنىن قاداپ تۇرىپ ايتتى. الماتى اكىمى اقاۋلاردى قىسقا مەرزىمدە جويۋدى، ال مىندەتىن جاۋاپسىز اتقارعان مەردىگەر ۇيىمدى سوتقا بەرۋدى تاپسىردى. بۇدان باسقا، «اك Construction» ج ش س قۇرىلىس جۇمىستارىن مەرزىمدەردى بۇزىپ جۇرگىزۋدە: كومپانيا 2023 جىلدىڭ مامىر ايىندا جۇمىسىن اياقتاۋى ءتيىس ەدى.
ايتا كەتەرلىگى، اۋداندا، الماتى سىندى حالىق سانىنىڭ ءوسۋى بايقالادى. ماسەلەن، ەگەر 2013 جىلى جەتىسۋ اۋدانىنىڭ حالقى 143 مىڭ ادام بولسا، 2023 جىلى ونىڭ سانى 196 مىڭ ادامعا جەتتى.
